Mana kaka waseneno, Yesu ne nigi teko mar chango jotuo kendo chiero jomotho. To ok mano kende, ne en gi teko bende mar chiko yamo kod koth. Chieng’ moro bang’ lemo e wi got, noneno ka apaka mager ni e Nam Galili. Jootene ne ni e i yie ka githuthni mondo yamo kik tergi. Yesu ne olor koa e got, kendo ne ochako wuotho e wi pi kochomo yie ma ne jootene nitiere. Ka ne jootego oneno ka ng’ato wuotho e wi pi, luoro ne omakogi. Kata kamano, Yesu ne onyisogi niya: ‘En mana an. Kik uluor.’

Petro ne owacho niya: ‘Ruoth, ka en in adier, nyisa mondo awuoth e wi pi ka abiro iri.’ Yesu ne odwoke kama: ‘Bi.’ E sama yamo ne pod dhi nyime kudho matek, Petro ne owuok e i yie mochako wuotho e wi pi kodhi ir Yesu. Kata kamano, ka ne omedo sudo machiegni gi Yesu, ne orango yamo ma ne gerno mi obedo maluor mochako nimo. Petro ne ogoyo koko kamae: ‘Ruoth, resa!’ Yesu ne omako lwete ka pok onimo konyise niya: ‘Ichako bedo maluor nang’o? Yieni tin manadeni?’

Yesu gi Petro ne odonjo e yie, kendo mapiyo bang’ mano, nam ne okue. Parie kaka joote Yesu nowinjo e chunygi. Ne giwacho niya: ‘In wuod Nyasaye gadier.’

Nitie kinde mamoko mang’eny ma Yesu nokueyo nam, yamo, kod kor lwasi. Nitie chieng’ moro ma nindo ne otero Yesu e nam ka gin e wuoth moro. E sama ne onindono, apaka mager ne otugore, kendo mano ne omiyo pi opong’ e yie. Jootego nochiewo Yesu ka gikok niya: ‘Japuonj, watho! Konywa!’ Yesu ne ochiewo mi owacho ne nam kama: “Ling’ thi!” Bang’ kosewacho kamano, nam nokue. Yesu ne openjo jootene niya: ‘Yie maru ni kanye?’ Ne giwuoyo e kindgi giwegi niya: “Kata mana yamo kod nam winje.” Jootego ne opuonjore ni ka gigeno kuom Yesu chuth, to ne ok onego gibed gi luoro moro amora.