Nahavita nanasitrana ny marary sy nanangana ny maty i Jesosy. Vitany koa anefa ny nibaiko ny rivotra sy ny orana. Avy nivavaka teny an-tendrombohitra izy, dia hitany hoe nisy tafio-drivotra be teny amin’ny Ranomasin’i Galilia, nefa tao anaty sambokely ny apostoly. Novoizin-dry zareo mafy ilay sambo ary sahirana be ry zareo, satria nifofofofo be ny rivotra. Dia nankeny amin-dry zareo i Jesosy, ka nandeha teo ambony ranomasina. Natahotra ny apostoly nahita azy. Hoy anefa izy: ‘Izaho ihany ity fa aza matahotra.’

Dia hoy i Petera: ‘Tompo ô, asaivo mankeny aho raha ianao tokoa io.’ Hoy i Jesosy: ‘Avia àry e!’ Sahy niala tao anaty sambo i Petera ary nandeha teo ambony rano, dia nankeny amin’i Jesosy. Nijery an’ilay tafio-drivotra anefa izy rehefa akaiky an’i Jesosy, ka natahotra ary nanomboka nilentika. Dia niantsoantso izy hoe: ‘Vonjeo aho Tompo ô!’ Noraisin’i Jesosy àry ny tanany sady hoy izy: ‘Maninona ianao no nisalasala sy tsy ampy finoana?’

Niakatra tao anaty sambo i Jesosy sy Petera, ary tonga dia nijanona ilay tafio-drivotra. Dia ahoana hoy ny apostoly nahita an’izany? Hoy ry zareo: ‘Tena Zanak’Andriamanitra marina ianao!’

Tsy tamin’iny ihany i Jesosy no nanao hoatr’izany. Nandeha sambo izy sy ny apostoly, indray mandeha, ary natory tao aoriana i Jesosy. Nisy tafio-drivotra be avy eo. Nanonja be ny ranomasina, ary tafiditry ny rano ilay sambo. Nofohazin’ny apostoly i Jesosy, dia hoy ry zareo: ‘Mpampianatra ô, ho faty isika androany! Mba ampio izahay!’ Nifoha i Jesosy ka niteny tamin’ny ranomasina hoe: “Mangìna!” Tonga dia tony ny ranomasina sy ny rivotra. Dia hoy i Jesosy: ‘Fa maninona ianareo no tsy ampy finoana?’ Dia nifampiresaka ry zareo hoe: ‘Na ny rivotra sy ny ranomasina aza ve rangahy manaiky an’azy!’ Lasa fantatry ny apostoly hoe raha tena matoky an’i Jesosy ry zareo, dia tsy tokony hatahotra na inona na inona.