A Zeezi ra tara tõog n sãoogd nebã bãas la a vʋʋgd neb sẽn ki. La pa rẽ bal ye. A ra tõe n kɩtame tɩ sobgã ne saagã maan yẽ sẽn date. Daar a ye, a Zeezi tɩ pʋʋsa tãng zug n sa, n ges Galɩle mogrã sẽnese, n mik tɩ sob-kãseng n yiki. A tʋm-tʋmdbã sẽn da be batayo wã pʋgẽ wã ra gaada koomã ne b pãngã fãa. A Zeezi yii tãngã zug n sigi, n kẽn koomã zug n teesd b sẽn beẽ wã. Tʋm-tʋmdbã wa n nee ned sẽn kẽnd koomã zug n watẽ, tɩ rabeem yõk-ba. La a Zeezi yeel-b lame yaa: ‘Yaa maam, da yɛɛs-y ye.’

A Pɩyɛɛr yeelame: ‘Zu-soaba, sã n sɩd yaa foo, yeel maam tɩ m wa.’ T’a Zeezi yeel-a t’a wa. A Pɩyɛɛr yii batayo wã pʋgẽ, n kẽnd koomã zug n debd a Zeezi nengẽ. A sẽn wa n kogl a Zeezi wã, a gesa sobgã n yɛɛse, n sɩng n bõrda. A kelmame n yeel yaa: ‘Zu-soaba, fãag-ma.’ La a Zeezi gãda a nugã n yeel-a yaa: ‘Bõe yĩng tɩ fo yɛɛse. Fo pa tar tẽeb la?’

A Zeezi ne a Pɩyɛɛr kẽe batayo wã pʋgẽ, la zĩig pʋgẽ sobgã yalsame. Tags n ges tʋm-tʋmdbã manesem sẽn yɩ to-to. B yeela a Zeezi yaa: ‘Fo sɩd yaa Wẽnnaam Biiga.’

Daar a to me, a Zeezi kɩtame tɩ sobg ne saag maan yẽ sẽn date. Badaarã, a Zeezi ne a tʋm-tʋmdbã ra bee batayo pʋg Galɩle mogrã zugu, t’a leb batayo wã poor n gõe. La sob-kãseng n yik mogrã zugu, n pengd batayo wã, tɩ koomã kẽedẽ, hal tɩ batayo rat n pidi. Tʋm-tʋmdbã neka a Zeezi, n yeel yaa: ‘Karen-saamba, tõnd na n kiime. Sõng-do.’ A Zeezi yikame n yeel koomã yaa: ‘Bas bʋrgã.’ Zĩig pʋgẽ, sobgã saame, tɩ zĩigã lebg sɩddd. A Zeezi soka a tʋm-tʋmdbã yaa: ‘Yãmb pa tar tẽeb la?’ Tʋm-tʋmdbã goma ne taab n yeel yaa: ‘Baa sobgã ne ko-kãsengã maanda yẽ sẽn datã.’ B bãngame tɩ b sã n teeg a Zeezi zãng-zãnga, b pa segd n le yɛɛs ye.