သင်ခန်းစာ ၈၄
ယေရှု ရေပေါ် လမ်းလျှောက်
ယေရှုဟာ လူနာတွေကို ရောဂါကုပေး၊ လူသေတွေကို ထမြောက်ပေးနိုင်တဲ့အပြင် လေနဲ့မိုးကိုပါ ထိန်းချုပ်နိုင်တယ်။ ဆုတောင်းပြီးနောက် တောင်ပေါ်ကနေ ဂါလိလဲအိုင်ကို ကြည့်လိုက်တဲ့အခါ မုန်တိုင်းဖြစ်နေတာကို ယေရှု တွေ့လိုက်တော့ တောင်အောက်ဆင်းပြီး လှေကိုမနည်းထိန်း လှော်ခတ်နေကြတဲ့ တမန်တော်တွေဆီ ရေပေါ်လမ်းလျှောက် သွားတယ်။ လူတစ်ယောက် ရေပေါ်လမ်းလျှောက်ပြီး သူတို့ဆီလာနေတာကို တွေ့လိုက်လို့ တမန်တော်တွေ လန့်သွားကြတယ်။ ဒီအခါ ယေရှုက ‘ကျွန်တော်ပါ။ မကြောက်ကြပါနဲ့’ လို့ ပြောတယ်။
ပေတရုက ‘သခင်၊ တကယ်ပဲ သခင်ဟုတ်တယ်ဆိုရင် ကျွန်တော် သခင့်ဆီလာဖို့ အမိန့်ရှိပါ’ လို့ ပြောတော့ ပေတရုကို ယေရှုက ‘လာခဲ့ပါ’ တဲ့။ ဒါနဲ့ ပေတရုဟာ မုန်တိုင်းထန်နေတဲ့ကြားက လှေပေါ်ကနေ ဆင်းပြီး ယေရှုဆီ ရေပေါ် လမ်းလျှောက်သွားတယ်။ အနားရောက်တော့မှ မုန်တိုင်းထန်နေတာကို ပေတရု ကြည့်လိုက်တော့ ကြောက်စိတ်ဝင်ပြီး နစ်တော့မလို ဖြစ်သွားတဲ့အခါ ‘သခင်၊ ကယ်ပါဦး’ လို့အော်လိုက်တယ်။ ယေရှုက သူ့ကိုလှမ်းဆွဲလိုက်ပြီး ‘ယုံကြည်ခြင်းနည်းတဲ့သူ၊ ဘာလို့ သံသယဝင်တာလဲ’ လို့ ပြောတယ်။
ယေရှုနဲ့ပေတရု လှေပေါ်တက်တာနဲ့ မုန်တိုင်းငြိမ်သွားတယ်။ တမန်တော်တွေ ဘယ်လိုနေမလဲဆိုတာ စဉ်းစားကြည့်။ သူတို့က “သခင်ဟာ တကယ်ပဲ ဘုရားသခင်ရဲ့သားပါ” လို့ပြောကြတယ်။
ရာသီဥတုကို ဒီတစ်ကြိမ်ပဲ ယေရှု ထိန်းချုပ်တာ မဟုတ်ဘူး။ တစ်ခါမှာ ယေရှုနဲ့ တမန်တော်တွေ အိုင်တစ်ဖက်ကမ်းကို ရွက်လွှင့်သွားနေတုန်း လှေပဲ့ပိုင်းမှာ ယေရှု အိပ်ပျော်နေတယ်။ အဲဒီအခါ လေပြင်းမုန်တိုင်း တိုက်ခတ်လာပြီး လှေထဲ ရေဝင်လာလို့ လှေနစ်တော့မလို ဖြစ်သွားတော့ တမန်တော်တွေက ယေရှုကို လာနှိုးပြီး “ဆရာ၊ ကျွန်တော်တို့ သေတော့မယ်၊ ကယ်ပါဦး” လို့ အကူအညီတောင်းတယ်။ ဒါနဲ့ ယေရှု ထပြီး လှိုင်းနဲ့လေကို “တိတ်ဆိတ်ငြိမ်သက်စေ” ဆိုပြီး အမိန့်ပေးတဲ့အခါ မုန်တိုင်းစဲပြီး ငြိမ်သွားတယ်။ ယေရှုက ‘ခင်ဗျားတို့ရဲ့ ယုံကြည်ခြင်း ဘယ်ရောက်သွားသလဲ’ လို့မေးတယ်။ ‘လှိုင်းနဲ့လေတောင် သူ့စကားကို နားထောင်ပါလား’ လို့ အချင်းချင်း ပြောကြတယ်။ ယေရှုကို အပြည့်အဝ ယုံကြည်ကိုးစားရင် ဘာကိုမှ ကြောက်စရာမလိုမှန်း တမန်တော်တွေ သိသွားကြတယ်။
“သက်ရှိလောကမှာ ယေဟောဝါရဲ့ ကောင်းမြတ်ခြင်းကို ခံစားရမှာပါဆိုတဲ့ ယုံကြည်ချက်သာ မရှိခဲ့ရင် ကျွန်တော် ဘယ်ဆီကိုများ ရောက်နေမလဲ။”—ဆာလံ ၂၇:၁၃