Jesús uelia kinpajtiaya akin mokokouayaj uan kinajokuia akin momikiliayaj. Uan no, uelia kitamatiliaya ejekat uan kiouit. Satepan ke kichiuak netataujtil itech tepet, Jesús pantachiak itech ueyiat tein poui Galilea uan kiitak ke chikauak taejekatoya. Itatitaniluan mochikaujtoyaj kinejnemiltiskej barco. Yejua ika Jesús temok uan peuak nejnemi aixko kinajsiti. Keman tatitanilmej kiitakej ke aksa nejnentoya aixko, motelmoujtijkej. Sayoj ke Jesús kiniluij: “Amo ximouikan, ta nejua”.

Pedro kijtoj: “NoTekotsin, komo tejua, xinechilui maj nimitsajsiti”. Jesús kiluij: “¡Xiuiki!”. Yejua ika Pedro temok uan peuak nejnemi aixko kiajsiti Jesús maski tel chikauak taejekatoya. Sayoj ke keman Pedro kiajsitoyaya Jesús, kiitak chikaujkaejekat, uan mouik. Kimachilij ke peuaya pankalakia uan kitsajtsilij: “¡NoTekotsin, xinechmakixti!”. Jesús kimakitskij uan kiluij: “¿Keyej timouik? ¿Amo titakuaujtamati?”.

Jesús uan Pedro tejkokej itech barco, uan chikaujkaejekat niman motamatilij. ¿Tiknemilia keniuj momachilijkej tatitanilmej? Kijtojkej: “Yekmelauj tiiKonetsin Dios”.

Jesús amo sayoj ijkuak kitsakuilij chikaualis tein kipia itachijchiualis Dios. Okse tonal, keman yejua uan itatitaniluan kipanauijtoyaj ueyiat itech barco, Jesús kochtiyaj takuitapan. Keman kochtoya, peuak chikaujkaejeka. At kiuiuitekia barco, uan peuak akalaki. Tatitanilmej kijxitijkej Jesús uan kiluijkej chikauak: “¡Tamachtijkej, timikitij! ¡Xitechpaleui!”. Jesús meuak uan kiluij ueyiat: “¡Ximotamatili!”. Ejekat uan ueyiat niman motamatilijkej. Ompa Jesús kintajtanij tatitanilmej: “¿Xe amo nantakuaujtamatij?”. Uan yejuan moiluijkej: “¡Hasta ejekat uan ueyiat kitakamatij!”. Tatitanilmej kimatkej ke komo senkis takuaujtamatiaj iuan Jesús, monekia amo teyi kimouiliskej.