Jesu wairapa vanohwara, waimusa vakafa zve waikwanisazve kukamisa mbhepo no nvura. Painga apeja kukumbira pa dundhu, Jesu wakasota mu jombe ro Garireya wakavona kuti kwainga kotanga kuita dutu no mavimbi. Vapostori vainga mungarava, vecitutwa vecienda ku divi kwaibva mbhepo. Jesu wakabjuka pa dundhu zve wakatanga kufamba panyezuru po kumwa ecienda kwainga no ngarava. Vapostori povakavona mundhu ecifamba ngo nyezuru po kumwa, vakathya. Asi Jesu wakavabvunja kuti: ‘Ndini. Mucathya’.

Pedru wakati: ‘Tenji, kudari muri imwimwi, ndibvunjenyi ndiviye kwamuriwaro.’ Jesu wakati kuna Pedru: ‘Viyai kuno’. Ngokudaro wakabuda mungarava, wakatanga kufamba panyezuru po kumwa ecienda kwainga na Jesu. Asi paainga phedo naye, Pedru wakasota mavimbi zve wakatanga kuthya. Iyena wakatanga kundondomera. Pedru wakakhuwa eciti: ‘Tenji ndiponesenyivo!’ Jesu wakamubata mukono, womubvunja kuti: ‘Ngenyi iwewe watanga kuthya? Kutenda kwako kuri kwapi?’

Jesu na Pedru vakanghwina mu ngarava, ciripo-ripoco dutu rakapera.Rangariranyi vapostori vakazwa kudini? Ivona vakati: “Bzokadi kuti muri Mwana wa Mwari.”

Apo asipi pega Jesu paakavonerera zviro zvinoitika zvega. Nguva jimweni, Jesu no vapostori vake pavainga vecienda ku divi rimweni ro jombe, Jesu wainga ecivata sure ko ngarava. Painga ecivata, kwakamuka dutu rakakura. Mavimbi akataka ngarava zve ngarava yakazara ngo kumwa. Vapostori vakamusa Jesu, vecikhuwa: ‘Mujijisi, tiri kufa! Tibesenyivo!’ Jesu wakamuka zve wobvunja jombe kuti: “Nyarara” Ngo kukasika mbhepo no jombe zvakanyarara. Jesu wabvunjisa kuti: ‘Kutenda kwenyu Kuri kwapi?’ Vakabvunjana umwe no umweni: ‘Pikija mbhepo no jombe bzinomupurukira’. Vapostori vakajijira kuti kudari vakanyidira Jesu mukuperera, avacadikanazve kuthya ciri cese.