Jesu o be a sa kgone feela go fodiša balwetši le go tsoša bahu, eupša gape o be a kgona go laola diphefo le pula. Ge a be a boa go yo rapela thabeng, o ile a lebelela lewatleng la Galilea gomme a bona phefo e kgolo. Baapostola ba gagwe ba be ba le ka sekepeng lewatleng leo, gomme phefo yeo e dira gore sekepe sa bona se palelwe ke go sepela. Jesu o ile a theogela lewatleng leo, a ya sekepeng seo a sepela godimo ga meetse. Ge baapostola ba bona motho a sepela godimo ga meetse, ba tšhoga kudu. Eupša Jesu a re go bona: ‘Le se ke la boifa. Ke nna.’

Petro a re: “Morena, ge e ba e le wena, ntaele gore ke tle go wena.” Jesu a re go Petro: “Tlaa!” Le ge phefo yeo e be e tšhoša, Petro o ile a fologa sekepe gomme a ya go Jesu a sepela godimo ga meetse. Eupša ge Petro a šetše a le kgauswi le Jesu, o ile a lebelela phefo yeo. O ile a tšhoga gomme a ikwa a thoma go sobelela ka meetseng. Petro o ile a goeletša a re: “Morena mphološe!” Jesu a mo swara ka seatla gomme a re go yena: ‘Ke ka baka la eng o fentšwe ke go belaela? Tumelo ya gago e kae?’

Jesu le Petro ba ile ba namela ka sekepeng, gomme ka yona nako yeo phefo ya kgaotša. O nagana gore baapostola ba ile ba ikwa bjang ge ba bona mohlolo wo? Ba ile ba botša Jesu ba re: “Ruri o Morwa wa Modimo.”

E be e se la mathomo Jesu a laola phefo e kgolo. Nakong e nngwe ge yena le baapostola ba gagwe ba be ba tshela lewatle, o ile a robala moseleng wa sekepe. Ge a dutše a robetše, gwa ba le phefo e kgolo. Meetse a lewatle leo a ile a tsena ka sekepeng sa bona gomme sa tlala meetse. Baapostola ba tsoša Jesu, gomme ba goeletša ba re: ‘Morutiši re thuše, re a hwa!’ Jesu a tsoga gomme a bolela le lewatle a re: “Homola o re tuu!” Ka yona nako yeo, phefo yeo ya kgaotša. Ke moka Jesu a botšiša baapostola ba gagwe a re: “Tumelo ya lena e kae?” Ba botšana ba re: ‘Gaešita le diphefo le meetse di a mo kwa.’ Baapostola ba ile ba ithuta gore ge ba ka bota  Jesu kudu, ga go hlokagale gore ba tšhabe selo.