Jesus éí bąąh dah nahazʼánígíí náyííłdzííʼ dóó daneeznánę́ę néiidiyiiłjééʼ, áádóó níyol dóó nahałtin bikʼeh dahółʼįįd. Jesus sodolzingo dziłghą́ą́ʼdę́ę́ʼ Sea of Galilee tó bikááʼ nahałtin bił niyolgo yinéłʼı̨́. Daalʼaadii éí níyol biniinaa tsinaaʼeeł chʼééh ádajiłʼı̨́. Jesus dziłghą́ą́ʼdę́ę́ʼ adááyáago tsinaaʼeeł yichʼįʼ tó yikááʼ dah diiyá. Daalʼaadii tó bikááʼ łaʼ joogáałgo dayiiłtsą́, áko nídaasdzííd. Ndi Jesus áháłní: ‘Shíyeeʼ áshtʼı̨́. Tʼáadoo nídaałdzidí.ʼ

Peter ájíní: ‘Bóhólníihii, tʼáá aaníí ni ánítʼı̨́įgo, wóshdę́ę́ʼ shidiní.ʼ Áko Jesus éí Peter hágo bizhdííniid. Ayóó átʼéego niyolgo nahałtin ndi, Peter éí tsinaaʼeeł biiʼdę́ę́ʼ hajííyáago táłkááʼ Jesus bichʼįʼ dashdiiyá, ndi bichʼįʼ joogáałgo níyol bidziilígíí béédzísdzííd. Áko táłtłʼááh góyaa yaazhdeezhtłizhgo, ‘Bóhólníihii, yisdáshíłteeh,’ jiníigo hazhdoolghaazh. Jesus hálaʼ yisiłgo áháłní: ‘Haʼátʼíí biniinaa neʼoodląʼ biʼoh silı̨́ı̨́ʼ?’

Jesus dóó Peter tsinaaʼeeł biih níjootʼáazhgo, tʼáá ákǫ́ǫ́ ííyol. Daalʼaadii díishąʼ haitʼéego baa tsídazdeezkééz? Ádajiní: “Tʼáá aaníí Diyin God biYeʼ nílı̨́ı̨́ lá.”

Doo tʼáá kwii tʼéiyá Jesus weather bikʼeh hóółʼįįd da. Náánáłah éí Jesus dóó daalʼaadii tónteel tséʼnaa tsinaaʼeeł bee jookahgo yéigo deeyol. Tó bił níyolígíí tsinaaʼeeł biiʼ hadéébįįd. Daalʼaadii Jesus chʼéédeesidgo ádeiłní: ‘Naʼnitiní, daʼ tó nihidooghą́łígíísh doo niʼdiiłʼáa da? Nihíká anilyeed!ʼ Jesus nídiiʼnaʼgo tónteel ííłní: “Kʼadí! Hashtʼedítʼeeh!” Áko ííyol, índa tʼáá íiyisíí hodiiyeel. Jesus áhodííniid, ‘Daʼ tʼahdiísh doo daʼiinohdlą́ą da?’ Ádaʼahidooʼniid, “Níyol áádóó tó nidi bikʼeh dahółʼı̨́.” Daalʼaadii éí Jesus yéigo badaʼjólíigo doo haʼátʼíhída béédajildzid da doogo baa ákodazhniizı̨́ı̨́ʼ.