Yesu akaba naabaasa kutambira abantu kandi akazoora abaafiire, kwonka akaba aine n’obushoboorozi aha muyaga n’enjura. Yesu ku yaaherize kushaba aha rushozi, akareeba eihunga aha Nyanja Galilaaya. Entumwa ze zikaba ziri omu bwato, omuyaga gurikuziremesa kuvuga obwato. Yesu akagyendera aha maizi arikuza ahu obwato bwabaire buri. Entumwa ku zaareebire orikugyendera aha maizi, zaatiina. Kwonka Yesu akabagira ati: ‘Niinye. Mutatiina.’

Petero akagira ati: “Mukama wangye, ku oraabe ori iwe, ndagiira, nyije aho.” Yesu akamugarukamu ati: “Ija.” Ahagati y’eihunga, Petero akaruga omu bwato yaatandika kugyendera aha maizi kushanga Yesu. Kwonka Petero ku yaareebire omuyaga gwaba mwingi, yaatiina. Petero akatandika kutobera omu maizi. Akagira ati: ‘Mukama wangye, njuna.’ Yesu akamukwata omukono, yaamugira ati: ‘Ahabw’enki noobanganisa? Iwe oine okwikiriza kukye.’

Ahonaaho, Yesu na Petero ku baagiire omu bwato, omuyaga gwatuuza. Teekateeka aha ku entumwa baayehuriire! Bakamugira bati: “Buzimazima ori Omwana wa Ruhanga.”

Ogu gukaba gutari murundi gw’okubanza Yesu kucureeza eihunga. Aha murundi ogundi, obu Yesu n’entumwa ze baabaire bari omu bwato aha nyanja, Yesu akaza enyima omu bwato yaagwejegyera. Ku yaabaire agwejegyeire, hakabaho eihunga ry’amaani. Ebingonzi bikeeshuka omu bwato, obwato bwijuramu amaizi. Entumwa zikamusiisiimura nizigira ziti: “Mukama waitu, tujune, twafa.” Yesu akaimuka yaagambira enyanja ati: “Cureera.” Ahonaaho, eihunga ryacureera. Yesu akabuuza entumwa ze ati: ‘Ahabw’enki mutaine kwikiriza?’ Bakagambirana bati: “Eihunga n’enyanja, nabyo nibimuhurira.” Entumwa zikeega ngu baaba nibeesigira kimwe Yesu, tibashemereire kutiina ekintu kyona.