Tɛ wuliravolɛma angomekye a Gyisɛse yɛle bɛ ayile na ɔdwazole mowuamra a, ɛnee eza ɔlɛ anwoma nee ezule nwo zo tumi. Mɔɔ Gyisɛse hɔyɛle asɔne wɔ boka bie azo wiele la, ɔnwunle kɛ ahumu bie ɛlɛtu Galeli Nyevile ne azo. Ɛnee ye ɛzoanvolɛ ne mɔ wɔ ɛlɛne ne anu na bɛlɛbɔ mɔdenle kɛ bɛka ɛlɛne ne bɛahɔ aze. Duzu a Gyisɛse yɛle a? Ɔdiale azule ne anye ɔhɔle bɛ nwo ɛkɛ. Mɔɔ ɛzoanvolɛma ne nwunle kɛ awie lua azule ne anye la, bɛ ahonle dule. Noko Gyisɛse hanle hilele bɛ kɛ: ‘Medame ɔ. Bɛmmasulo.’

Pita hanle kɛ: ‘Awulae, saa ɛdawɔ amgba a, ɛnee maa membɛla ɛ nwo ɛkɛ.’ Gyisɛse hanle hilele Pita kɛ: “Bɛla!” Ɛnee ahumu ne ɛlɛtu, noko Pita vi ɛlɛne ne anu dwule na ɔdiale azule ne anye ɔhɔle Gyisɛse anwo ɛkɛ. Noko mɔɔ Pita bikyele Gyisɛse la, ɔdole ɔ nye ɔnleanle ahumu ne na ye ahonle dule. Akee ɔbɔle ɔ bo kɛ ɔnoma. Ɔdeanle nu kɛ: “Awulae, die me!” Gyisɛse zɔle ɔ sa na ɔhanle kɛ: ‘Duzu ati a wɔ adwenle nu yɛle wɔ kesee ɛ? Wɔ diedi ne wɔ ni?’

Gyisɛse nee Pita vole ɛlɛne ne anu na ɛkɛ ne la ahumu ne gyinlanle. Ɛnea a kɛzi ɛzoanvolɛ ne mɔ dele nganeɛ ɛ? Bɛhanle kɛ: “Ɛle Nyamenle Ara amgba!”

Tɛ anwoma ɛhye angomekye a Gyisɛse maanle ɔgyinlanle a. Mekɛ fofolɛ mɔɔ ɛnee Gyisɛse nee ye ɛzoanvolɛma ne ɛlɛkɔ nyevile ne anzi lɔ la, ɔwolole ɔhɔle ɛlɛne ne anzi lɔ ɔhɔlale. Mekɛ mɔɔ ɛnee nafelɛ ɛva ye la, ahumu kpole bie dule. Azɛlɛkye ne bɔle nzule guale ɛlɛne ne anu. Ɛzoanvolɛma ne dunwuele Gyisɛse na bɛdeanle nu kɛ: ‘Kilehilevolɛ, yɛwu yɛwie. Boa yɛ!’ Gyisɛse dwazole na ɔzele nyevile ne kɛ: “Yɛ koonwu!” Ɛkɛ ne ala, ahumu ne nee nyevile ne guale dii. Gyisɛse bizale ɛzoanvolɛ ne mɔ kɛ: “Bɛnlɛ diedi ɔ?” Bɛhanle bɛhilele bɛ nwo kɛ: “Anwoma nee nyevile bɔbɔ tie ye.” Ɛzoanvolɛma ne nwunle kɛ saa bɛnyia Gyisɛse anu diedi bɔkɔɔ a, ɔnle kɛ bɛsulo debie biala.