Jesusqa nunakunata kachakätsita y kawaritsitam puëdeq. Y hasta vientutawan tamyatapis mandädunchö katsinqantam rikätsikurqan. Jirkachö mañakïta usharir Galilëa qochaman rikärinampaqmi feyupa vientur tamyakïkänaq. Y apostolninkunaqa tsënö mana alli tiempuchömi barcunkunata imëkanöpa avanzatsita tïrëkäyarqan. Tsënam Jesusqa jirkapita urärir yaku janampa pëkunaman ëwar qallëkurqan. Y pë kanqanta mana musyarmi apostolninkunaqa alläpa mantsakëkuyarqan. Tsënam Jesusqa, “noqam kä. Ama mantsakäyëtsu” nirqan.

Pëdruqa, “Teytë, qam karninqa, ‘shamï’ nimë”, nirqanmi. Tsënam Jesusqa, “¡shamï!” nirqan. Y Pëdruqa barcupita yarpurirmi laqcheqsëkaqchö Jesusman defrenti ëwar qallëkurqan. Peru Jesusman chëkarnam, feyupa laqcheqsëkaqta rikëkur alläpa mantsakëkurqan. Y hundikar qallëkurmi, “¡Teytë, salvëkallämë!” nirqan. Tsënam Jesusqa rikrampita tsarirkur, “¿imanirtaq segürutsu karqunki? ¿Manaku markäkïniki kan?” nirqan.

Tsënam Jesuswan Pëdruqa barcuman lloqarkuyarqan, y tsëllanam vientupis y tamyapis pärarirqan. Pensari, ¿imanöraq apostolninkuna sientikuyarqan? Pëkunaqa, “qamqa rasumpam Diospa Tsurin kanki” niyarqanmi.

Jesusqa manam tsë kutillachötsu vientutawan tamyata mandädunchö katsinqanta rikätsikurqan. Juk kutim pëwan apostolninkuna barcuwan Galilëa qochata tsimpëkäyarqan, y Jesusqa barcupa qepan kaqchömi punukashqa këkarqan. Y tsënö këkaptinmi feyupa vientur y laqcheqsar qallëkurqan. Y yakuqa barcumampis juntarnam qallëkurqan. Tsëmi apostolninkunaqa, “¡Maestru, salvëkalläyämë, hundikärinapaqnam këkantsik!” nishpa qayar riyatsiyarqan. Tsënam Jesusqa sharkurnin qochata, “¡upälla! ¡Ama büllëtsu!” nirqan. Y jinan höram llapan pärarirqan. Tsënam Jesusqa, “¿manaku markäkïnikikuna kan?” nishpa apostolninkunata tapurqan. Y pëkunaqa kënömi ninakuyarqan: “¡Hasta vientupis y qochapis pë ninqantataq cäsukuyan!”. Tsëchömi apostolninkunaqa yachakuyarqan Jesusman chipyëpa markäkurqa ni imatapis mana mantsayänampaq kaqta.