Jesusca ungushcacunata alliyachinata, huañushcacunata causachinatami pudirca. Huairatapish tamyatapishmi jarcai pudirca. Urcupi Diosta mañashca qꞌuipaca Jesusca Galilea cuchatami ricurca. Chai cuchapi achca huaira jatarishcamantami apostolcunaca barcota tucui fuerzahuan purichicurcacuna. Chaimi Jesusca yacu jahuata purishpa paicunapajman rirca. Yacu jahuata purishpa shamucujta ricushpami apostolcunaca pi cashcata mana yachashpa achcata mancharircacuna. Jesusca, ‘ñucamari cani. Ama mancharichijchu’ nircami.

Chaimi Pedroca, ‘amito, can cashpaca ñucata shamui niyari’ nirca. Shina nijpimi Jesusca, ‘¡shamui!’ nirca. Chai ratomi barcomanta llujshishcahuan yacu jahuata puri callarirca. Pero, achca huaira yacuta cuyuchicujta ricushpami mancharirca. Yacupi ñalla pambarigrishpami, ‘¡amito, salvahuai!’ nishpa caparirca. Jesusca maquimanta japishpami, ‘ashallata crij runa ¿imamantataj mancharcanguiari?’ nirca.

Jesuspish Pedropish barcoman llujshijpica huairaca casijllami tucurca. Apostolcuna chaita ricushpaca ¿ima shinashi sintirishcacuna canga? Paicunaca Jesustaca, ‘Diospaj Churitajmi cangui’ nircacunami.

Shujtaj punllapish Jesusca apostolcunandijmi cucha chꞌimbanijta barcopi ricurcacuna. Jesusca huashamanmi dormicurca. Ñapish huaira, tamya jatarishpami yacuta caiman chaiman cuyuchirca. Chaimi yacuca barcopi jundai callarirca. Chai ratomi paita catijcunaca Jesuspajman cꞌuchuyashpaca, ‘¡yachachij huañugrinchijmari! ¡Ayudahuayari!’ nishpa rijchachircacuna. Pai rijcharishpaca huairatapish yacutapish casijlla tucuichij nishpa rimajpica casijlla tucurcallami. Jesusca, ‘¿ima nishpataj mana cringuichij?’ nijpi, paicunaca caishuj chaishuj, ‘¡cai runaca ¿pitagari? huairapish yacupish pai mandajpica cazunllamari!’ ninacurcacuna. Jesuspi tucui shunguhuan confiashpaca imatapish mana manchana cashcatami apostolcunaca intindircacuna.