Jesusqa manam unquqkunallatachu sanoyachirqa nitaq wañuqkunallatachu kawsarichirqa, payqa wayra-paratapas sosegachirqam. Huk kutipim Jesusqa urquman rirqa taytanta mañakuq, mañakuyta tukuruspanñataqmi Galilea lamar quchata qawariykurqa, hinaptinmi llumpay wayra-para kakuchkasqa. Apostolninkunapas tukuytam ruwachkasqaku chay bote mana chinkaykunanpaq. Chaymi Jesusqa chay urqumanta uraykamuspan yakupa hawanta yanapananpaq rirqa, apostolninkunañataqmi llumpayta mancharikurqaku. Hinaptinmi Jesus nirqa: “Ñuqam kani, ama manchakuychikchu”, nispa.

Pedroñataqmi Jesusta nirqa: “Señor, qam kaspaykiqa kamachiwayá yakupa hawanta qanman hamunaypaq”, nispa. Chaymi Jesus nirqa: “¡Hamuy!”, nispa. Hinaptinmi Pedroqa yakupa hawanta puriyta qallaykurqa. Ichaqa Jesusman asuykuchkaspanñam wayra-parata qawariykuspan mancharikurqa, hinaspapas chinkaykusqanta musyakuruspanmi Jesusta qayakurqa yanapaykunanpaq. Jesusñataqmi makinmanta hapispan nirqa: “¿Imanasqataq iskayrayarunki, manachu iñiyniki kan?”, nispa.

Chay boteman Jesuswan Pedro qispiruptinkum wayra-paraqa sosegarurqa. Chaymi apostolkuna kusisqa tarikuspanku nirqaku: “Qamqa Diospa churinmi kasqanki”, nispa.

Huk punchawpas apostolninkunawan botepi chimpachkaspanmi Jesusqa chay botepa qipa lawninpi puñururqa, hinaptinmi puñunankama wayra-para qallakuykurqa. Botemanpas yakum yaykururqa lamar qucha aywityasqanrayku. Chaymi apostolkunaqa Jesusta rikchachispanku nirqaku: “¡Yanapaykuwayku, mana chayqa wañurusunmi!”, nispa. Jesusñataqmi wayra-paratawan lamar quchata “hawkayayña” nispan sosegarachirqa. Hinaspam apostolninkunata tapurqa: “¿Manachu iñiynikichik kan?”, nispa. Paykunañataqmi nirqaku: “¡Wayra-parawan lamar quchapas kasusqamiki!”, nispa. Chaypim apostolninkuna yacharurqaku mana manchakuq kanankupaq hinaspa Jesusmanta mana iskayrayanankupaq.