Jesusqa atiranmi wayratapas paratapas controlayta. Jesusqa orqopi Diosmanta mañakusqan qhepamanmi rikuran Galilea lamar-qochata sinchi wayra aytikachashasqanta. Apostolkunaqa tukuy atisqankutan ruwasharanku botenku mana chinkaykunanpaq. Chaymi Jesusqa orqomanta urayamuspa boteq kasqanman unu patanta puriran. Apostolkunaqa rikurankun unuq patanta purimuqta, jinan mancharikuranku. Chaymi Jesusqa niran: “Noqan kani, ama manchakuychischu”, nispa.

Pedrotaq niran: “Señor, qanchus kanki chayqa, kamachiway qanman purimunaypaq”, nispa. Jesustaq niran: “Jamuy”, nispa. Chaymi Pedroqa unu patanta puriran, ichaqa Jesusmanña qayllaykushaqtinmi lamar-qochaq aytikusqanta qhawarispa mancharikuran, jinaspa unuman chinkaykusharan. Chaymi Pedroqa niran: “¡Señor aysaruway!”, nispa. Jesustaq makinmanta jap’ispa niran: “¿Imaraykun iskayaranki? ¿Maytaq iñiyniykiri?”, nispa.

Jesuswan Pedrowan boteman wichaqtinku jinan lamar-qochaqa thanipuran. ¿Imaynan apostolkuna sientekuranku? Nirankun: “Qanpunin Diospa Churinqa kanki”, nispa.

Jesusqa manan chay kutillapichu wayrata paratapas controlaran. Juj kutipin apostolninkunawan botepi viajashaqtin payqa boteq jayt’anpi puñusharan. Jinan lamar-qochaqa sinchita aytikuran unupas botemanmi junt’aykusharan. Chaymi apostolkunaqa Jesusta rijch’achispa niranku: “¡Señor, wañusunñan! ¡Salvawayku!”, nispa. Jesustaq sayarispa lamar-qochata niran: “Samp’ayay”, nispa. Jinan manaña wayramuranchu, nitaq lamar-qochapas aytikuranñachu. Jinan Jesusqa apostolkunata niran: “¿Maytaq iñiyniykichisri?”, nispa. Paykunataq ninakuranku: “Wayrapas lamar-qochapas kasunmi”, nispa. Chaywanmi apostolkunaqa yacharanku Jesuspi confiaspaqa mana imamantapas manchakunankuchu kasqanta.