О Иисусо моӷ най кати тэ исцелий лэ насвалэн и тэ рий каринг и жизня кодэлэн, ко муля, но и тэ улэл и балвал и о брышын. Кала о Иисусо парашэля тэ мангэлпэ по плай, во диқля тэлэ пэ Галилейско моря и додиқля, кай котэ бари балвал. Лэстирэ апостолоря сас андэ лодка. Вонэ анда вся о зор плавуинас против и балвал. О Иисусо змэкляпэ па плай и жыля ворта па паи каринг лэндири лодка. Кала и апостолоря додиқлэ, кай варико жал па паи, вонэ фартэ пэрэдарайлэ. Но о Иисусо ԥэндя лэнди: «На даран. Када мэ».

О Пётро ԥэндя: «Ӷосподо, сар па чачимастэ када ту, ԥэн манди, кай мэ тэ авав каринг тутэ». О Иисусо ԥэндя: «Ав». Хоть и сас бари балвал, о Пётро вижыля анда лодка и жыля па паи кай о Иисусо. Но кала о Пётро сас пашэ, во диқля пэ бари балвал и пэрэдарайля. Во ля тэ тасол и зацыписайля: «Ӷосподо, спасысар ман!» О Иисусо астардя лэс вастэстар и ԥэндя: «Васо ту парашэлян тэ патяс? Кай тири вера?»

Кала о Иисусо и о Пётро заӷульдэ андэ лодка, и бари балвал сразу парашэля. Погиндосар, со сас по ди кай и апостолоря. Вонэ ԥэндэ: «Ту па чачимастэ лэ Дэвлэско шаво».

Када сас най еқвар, кала о Иисусо улэлас и поӷода. Еквар, кала о Иисусо и апостолоря плавуинас пэ авэр риг моря, о Иисусо засутя андэ лодка. Вазгляпэ бари балвал. И волны марэнаспэ андэ лодка и андэр латэ зашоласпэ о паи. И апостолоря жунгадэ лэ Иисусос. Вонэ цыпинас: «Учителё, амэ всаворэ помэраса! Поможысар амэнди!» О Иисусо ущеля и ԥэндя лэ паести: «Улэпэ!» И балвал и моря сразу же улинэпэ. О Иисусо пушля кай и апостолоря: «Кай тумари вера?» Вонэ ԥэндэ ек еқэсти: «Даже и балвал и моря лэс кандэн». И апостолоря полинэ, сар андэ вся тэ патяс лэ Иисусости, тоди на трэбуй нисостар тэ дарас.