Jésus ayeke sava lani azo nga lo yeke zingo akuâ me a ngbâ gï ge ape, lo yeke nga na ngangu na ndö ti pupu nga na ngu. Jésus ague na ndö ti mbeni hoto, na peko ti so lo sambela, lo bâ ndo na gbe ni na lê ti Ngu ti Galilée, lo bâ so kota pupu alondo. Abazengele ti lo ayeke na yâ ti ngö, ala yeke tirika ti hon na yâ ti pupu ni. Jésus adescend na ndö ti hoto ni na lo komanse ti tambela na ndö ti ngu ti gue na mbage ti ngö ni. Abazengele ni abâ mbeni zo ayeke tambela na ndö ti ngu ni, mbeto angbâ asara ala. Me Jésus atene na ala: ‘Mbi la. Ala sara mbeto ape.’

Pierre atene: ‘Seigneur, tongana vrai a yeke mo, mû yanga na mbi ti gue na mbage ti mo.’ Jésus angbâ atene na Pierre: ‘Mo ga.’ Na milieu ti pupu so kue, Pierre adescend na yâ ti ngö ni na lo tambela na lê ti ngu ni ti gue na mbage ti Jésus. Me na ngoi so lo ga nduru na Jésus, Pierre abâ pupu ni na mbeto asara lo. Lo sentir so lo komanse ti lï ngu. Pierre adekongo, atene: ‘Seigneur, sö mbi!’ Jésus agbu maboko ti lo, lo tene: ‘Ngbanga ti nyen la mo komanse ti duti na kite? Mo yeke na mabe ape?’

Jésus na Pierre amonté na yâ ti ngö ni, na hio, pupu ni akaï. Tara ti imaginé tënë ti bê ti abazengele ni! Ala tene: “Mo yeke tâ Molenge ti Nzapa biani.”

Jésus ayeke na ngangu na ndö ti aye ni so gï fani oko ape. Na mbeni ngoi ni nde, tongana Jésus na abazengele ti lo amû mbeni ngö ti gue na mbeni mbage ti kota ngu, Jésus ague lo lango na ngbonda ti ngö ni. Na ngoi so lo ngbâ ti lango, mbeni kota pupu asara. Ngu atuku na yâ ti ngö ni, a mû yâ ni kue. Abazengele ni azingo Jésus, na ala dekongo, atene: ‘Maître, e yeke kui! Aidé e!’ Jésus alondo na lo tene na kota ngu ni, lo tene: “Kaï!” Droit, pupu ni akaï nga lê ti kota ngu ni akiri aduti kpô. Jésus ahunda abazengele ni, lo tene: ‘Ala yeke na mabe ape?’ Ala komanse ti tene na popo ti ala atene: “Même pupu na kota ngu amä yanga ti lo.” Abazengele ni amanda so tongana ala sara confiance kue na Jésus, mbeto ti ye oko ayeke sara ala ape.