Ha se feela hore Jesu o ne a khona ho folisa batho ba kulang le ho tsosa bafu, empa o ne a khona le ho laola lifefo le pula. Bosiung bo bong, Jesu o ne a le thabeng a il’o rapela. Ha a qetile ’me a sheba tlaase Leoatleng la Galilea, a bona sefefo. Baapostola ba hae ba ne ba le ka sekepeng ’me maqhubu a matla a se isa koana le koana. Ebe Jesu o ne a tla etsa’ng? O ile a theoha a tla leoatleng ’me a qala ho tsamaea holim’a metsi a ea sekepeng sa barutuoa ba hae. Ha ba bona motho a tsamaea holim’a metsi, ba ile ba tšoha haholo. Empa Jesu a re ho bona: ‘Ke ’na. Le se ke la tšoha.’

Petrose a re: ‘Morena, haeba kannete e le uena, ntumelle hore ke tle ho uena.’ Jesu a re ho Petrose: ‘Tloo.’ Joale Petrose a tsoa ka sekepeng ’me a qala ho tsamaea holim’a metsi a lebile ho Jesu. Empa eitse ha a ntse a atamela ho Jesu, Petrose a sheba sefefo eaba oa tšoha ’me o qala ho teba. Petrose a hoeletsa: ‘Morena, mpholose!’ Jesu a otlolla letsoho a mo tšoara, eaba o re ho eena: ‘Ke hobane’ng ha u ile oa hloka tumelo?’

Jesu le Petrose ba kena ka sekepeng ’me kapele-pele sefefo sa thola. U nahana hore baapostola ba ne ba ikutloa joang? Ba ile ba re ho Jesu: “Kannete u Mora oa Molimo!”

Lena e ne e se lekhetlo la pele Jesu a laola boemo ba leholimo. Ka lekhetlo le leng, o ne a tsamaea ka sekepe leoatleng le baapostola ba hae. Eaba Jesu o ea karolong e ka morao ea sekepe oa robala. Ha a ntse a khalehile, ho ile ha e-ba le sefefo se matla haholo. Maqhubu a leoatle a ne a otla sekepe ’me metsi a qala ho kena ka hare. Baapostola ba tsosa Jesu, ba hoeletsa ba re: ‘Mosuoe, rea shoa! Re thuse!’ Jesu a tsoha ’me a bua le leoatle, a re: “Khutsa!” Ka eona nako eo, leoatle le sefefo tsa kokobela. Jesu a botsa baapostola, a re: ‘Ke hobane’ng ha le se na tumelo?’ Ba qala ho buisana ba le bang ba re: “Esita le moea le leoatle lia mo mamela.” Baapostola ba ile ba ithuta hore haeba ba ne ba tšepa Jesu, ba ne ba sa lokela ho tšaba.