Ja Jesús wa xbʼobʼ ya tojbʼuk ja matik maloʼayi sok yajel sakʼwuk ja chamwiniki. Cha wa xbʼobʼ skom ja ikʼ soka jaʼi. Yajni chʼak yayi orasyon ja bʼa witsi, ja Jesús skʼela koʼ ja bʼa mar bʼa Galilea sok yila ay jun tsatsal xchawukil jaʼ. Ja sjekabʼanumiki teye bʼa jun barko wane slokbʼajel spetsanil yipe ja jaʼi yuja ikʼi. Ja yuj ja Jesús kokoʼe sok kʼe bʼejyuk ja bʼa sat jaʼ man bʼay ja barko. Yajni ja jekabʼanumik yilawe ay maʼ wan bʼejyel ja bʼa sat jaʼi, jel xiwye. Pe ja Jesús yala: «Keʼna. Mok xiwanik».

Ja Pedro yala: «Kajwal, ta weʼnkʼa, payawon man bʼaya». Ja Jesús yala: «¡Laʼ!». Jaxa Pedro el ja bʼa barko sok och bʼejyuk ja bʼa sat jaʼ man bʼay ja Jesús bʼa yojol ja tsatsal xchawukil jaʼi. Pe yajni ja Pedro mojanxa ja bʼay ja Jesús, skʼela ja tsatsal xchawukil jaʼi, sok xiwi. Yabʼ wanxa mukxel sok awani: «¡Kajwal, koltayon!». Ja Jesús syamayi ja skʼabʼi sok yala yabʼ: «¿Jas yuj kʼe tʼabʼtʼunuk akʼujol? ¿Yuj maʼ meyka wiʼoj skʼuʼajel?».

Ja Jesús soka Pedro kʼeye ja bʼa barko, sok tixta lamxi ja tsatsal xchawukil jaʼi. Pensaraʼan, ¿jastal maʼ yabʼye ja jekabʼanumiki? Ti yalawe: «Ja weʼni, merani Yunina Dyos».

Pe mi kechanuk ja ekʼele jaw ya lamxuk ja ikʼ soka jaʼi. Bʼa pilan kʼakʼu, yajni ja Jesús soka jekabʼanumik wajume bʼa pilan skʼaxil ja mari, ja Jesús ochkan swayel ja bʼa stop ja barko. Yajni wan wayeli, kʼe ajyuk jun tsatsal xchawukil jaʼ. Ja jaʼi kʼe spukʼtsuk ja barko sok kʼe bʼutʼuk yalel. Ja jekabʼanumiki awaniye bʼa syujkesel ja Jesús: «¡Maestro, oj chamkotik! ¡Koltayotikon!». Ja Jesús kʼeʼi sok yalyabʼ ja mari: «¡Chʼabʼanan! ¡Lamxan!». Ja bʼa jutsʼin jaw, ja ikʼ sok ja mari lamxi. Jaxa Jesús ti sjobʼo: «¿Yuj meyka wiʼojex skʼuʼajel?». Ja yeʼnle yala sbʼaje: «¡Wani skʼuʼaneyi ja ikʼ soka mari!». Ja jekabʼanumik snebʼawe ta wa sjipawe spetsanil skʼujole bʼa Jesús, mi jas oj bʼobʼ xiwukeyuj.