Yesu atagarukire ha kukiza abarwaire n’okuhumbuura abafu kwonka, baitu akaba n’asobora kutanga omuyaga n’enjura. Yesu obu yamazire kusaba ha rusozi, akarora ihunga ery’amaani ha Nyanja eya Galiraaya. Abakwenda be bakaba bali omu lyato nibalengaho kurwanisa ihunga linu. Yesu akaruga ha rusozi kandi yatandika kurubatira ha maizi. Abakwenda be obu baboine omuntu narubatira ha maizi bakatiina muno. Baitu Yesu akabagambira ati: ‘Ninyowe. Mutatiina.’

Petero akamugarukamu ati: ‘Mukama, obworaaba niiwe, ndagira nyije nambere oli.’ Yesu agambira Petero ati: ‘ija.’ Petero akaruga omu lyato yatandika kurubatira ha maizi kugenda hali Yesu omu ihunga eringi. Baitu Petero obwakaba ali haihi kuhika hali Yesu, akarora ihunga yatiina. Kandi yahurra atandikire kudikira. Petero akakuunga nagamba ati: ‘Mukama njuna!’ Yesu akakwata omukono gwe yamugambira ati: ‘Habwaki otandikire kugurukyagurukya? Okwikiriza kwawe kuli nkaha?’

Aho n’aho ihunga likaculeera hanyuma ya Yesu na Petero kutemba elyato. Nosobora kutekerezaho omulingo abakwenda bayehuliiremu hanyuma y’ihunga kuculeera? Bakagamba bati: “Mazimakwo niwe Mwana wa Ruhanga.”

Yesu atatange ihunga omurundi gumu gwonka. Kiro kindi, Yesu n’abakwenda be obu bakaba nibambuka enyanja, Yesu akagenda enyuma omu lyato yagwijagira. Ebigonzi bikateera elyato, kandi lyaijura amaizi. Abakwenda bakaimukya Yesu nibagamba bati: ‘Mwegesa, tuli haihi kufa! Tujune!’ Yesu akaimuka yagambira enyanja ati: “Culera!” Aho n’aho ihunga likaculeera kandi enyanja yatekaana. Yesu akakaguza abakwenda be ati: ‘Okwikiriza kwanyu kuli nkaha?’ Bakatandika kugambirangana bonka bati: “Aragira nomuyaga namaizi, nibimuhu’ra.” Ekintu kinu kikegesa abakwenda ngu, kakuba besigira kimu Yesu, tibaine kutiina ekintu kyona.