Иисус аарыгларны экиртиринден база чок апарган улусту диргизеринден аңгыда, хатты, чаъсты доктаадып шыдаар турган. Ол даг кырынга мөргээш, Галилея далайже көөрге, күштүг шуурган хадып турган. А хемеде элчиннер агым удур эжиндирип чораан. Иисус дагдан бадып келгеш, оларже уткуштур суг кыры-биле кылаштай берген. Далай кырында бир кижи кылаштап турарын элчиннер көрүп кааш, аажок корга берген. Иисус оларга: «Мен-дир мен, кортпаңар» — дээн.

Пётр: «Дээрги, шынап-ла сен болзуңза, мени сенче чеде бээр кылдыр чугаалап көрем» — деп алгырган. Иисус: «Бээр кел» — дээн. Шуурган хадып турза-даа, Пётр хемеден дүшкеш, Иисусче дорт суг кырлап чорупкан. Ол аңаа чоокшулап келгеш, шуургандан корга бергеш, сугже дүжүп эгелээн. «Дээрги, мени камгалаңар!» — деп, ол алгырыпкан. Иисус ооң холундан сегирип алгаш: «Чүге чигзинериң ол? Бүзүрелиң кайыл?» — дээн.

Иисус биле Пётр хемеже олуруптары билек, шуурган соксай берген. Элчиннер ону көргеш, чүнү миннинген деп бодаар сен? Олар аңаа: «Сен шынап-ла Бурганның оглу-дур сен» — дээн.

Иисус агаар-бойдусту оон-даа өске байдалдарда башкарып турган. Ол элчиннери-биле далайның өске талазынче эжиндирип бар чыткаш, хемеге удуй берген. Оон далайга күштүг шуурган көдүрлүп келген. Чалгыглар хемени часкаарга, суг ону долуп эгелээн. Ынчан элчиннер Иисусту оттурупкаш: «Башкы, бис сугга дүжүп өлдүвүс-ле, биске дузалап көрем!» — деп алгырышкан. Иисус туруп келгеш, далайга: «Сокса!» — дээн. Ынчан хат оожургай бээрге, шуут ыржым апарган. Оон Иисус элчиннеринден: «Бүзүрелиңер кайыл?» — деп айтырган. Олар бот-боттарынга: «Хат-даа, далай-даа ону дыңнап турар-дыр» — дижип турган. Иисуска долузу-биле бүзүрээр-ле болза, чүден-даа кортпас бис деп, элчиннер шынзыккан.