Li Jesuse la xpoxta li buchʼutik ipike xchiʼuk la xchaʼkuxes li animaetike. Pe maʼuk noʼox, yuʼun xuʼ yuʼun spas ta mantal xtok li voʼ xchiʼuk li ikʼe. Kʼalal laj xa ox yoʼonton ta spasel orasion ta vits li Jesuse, la skʼel batel li Nab Galileae vaʼun laj yil ti likem tsatsal ikʼaloʼ li ta nabe. Li yajtakboltake yakal chakʼik persa yoʼ xanavuk li svarkoike ta skoj ti ta yelovalik chtal li tsatsal ikʼe. Jaʼ yuʼun li Jesuse yal tal li ta vitse xchiʼuk lik xanavuk batel ta sba nab yoʼ xkʼot li ta varkoe. Kʼalal laj yilik li jtakboletik ti oy buchʼu yakal chanav talele, xiʼik tajek. Pe xi laj yal li Jesuse: «Voʼonun, mu xaxiʼik».

Xi laj yal li Pedroe: «Kajval mi voʼot ta melele albun ti akʼo xixanav batel yoʼ bu oyote». Vaʼun li Jesuse xi laj yale: «¡La!». Jech oxal li Pedroe yal li ta varkoe xchiʼuk lik xanavuk batel ta sba nab ti bu oy li Jesuse. Pe kʼalal chnopaj xa batel ta stojolal li Jesuse, laj yil ti xjumumet tajek li tsatsal ikʼaloʼe vaʼun xiʼ tajek. Kʼalal laj yaʼi ti yakal xa ox ch-och yalel ta voʼe xi lik avanuke: «¡Kajval koltaun!». Li Jesuse la stsakbe li skʼobe xchiʼuk xi laj yalbee: «¿Kʼu yuʼun ti xanaʼet toe? ¿Mi yuʼun muʼyuk xchʼunel avoʼonton?».

Kʼalal muyik xa ox ta varko li Jesus xchiʼuk Pedroe, paj li tsatsal ikʼe. ¿Mi xnop avuʼun yaʼel ti kʼu yelan laj yaʼi sbaik li jtakboletike? Xi laj yalike: «¡Ta batsʼi melel, voʼot Xnichʼonot li Diose!».

Taje maʼuk noʼox sba velta jech la spas li Jesuse. Yuʼun oy jun velta kʼalal jaʼo te tikʼilik batel ta varko yoʼ xjelavik ta jot nab xchiʼuk li yajtakboltake, li Jesuse och svayel ta spat li varkoe, vaʼun jaʼo lik jun tsatsal ikʼ. Li nabe tsots lik syukʼilan li varkoe xchiʼuk lik nojuk ta voʼ. Jaʼ yuʼun li jtakboletike xi tsots lik stijik li Jesuse: «¡Jchanubtasvanej, chichamkutik xa! ¡Koltaunkutik!». Vaʼun lik li Jesuse xchiʼuk xi laj yalbe li nabe: «Pajan, chʼabian». Vaʼun paj li ikʼ xchiʼuk li nabe, ta tsʼakale xi la sjakʼbe yajtakboltak li Jesuse: «¿Mi yuʼun chʼabal xchʼunel avoʼontonik?». Jaʼ yuʼun xi lik yalbe sbaik li jtakboletike: «Spas yuʼun ta mantal li ikʼ xchiʼuk li nabe xchiʼuk chchʼunbat». Li jtakboletike laj yakʼik venta ti skʼan spat yoʼontonik ta stojolal li Jesuse yuʼun mi jech tspasike muʼyuk kʼusi chiʼtaik-o.