Yesu ka ponduile lika oku sakula olombei kuenda oku pindula ava va fa, pole, wa ponduilevo oku tutuiya ofela kuenda ombela. Yesu noke yoku kala komunda oku likutilila, wa vanja vemehi Vokalunga ko Galilea kuenje wa mola ehunguhungu limue. Ovapostolo vaye va kala vowato oku liyaka lehunguhungu liaco. Yesu wa loka komunda kuenda wa fetika oku endela kilu liovava oku loña vowato mua kala ovapostolo. Eci ovapostolo va mola okuti omunu umue o kasi oku endela kilu liovava, va fetika oku kuata usumba. Pole, Yesu wa va sapuila hati: ‘Ame. Ko ka kuati usumba.’

Petulu wa popia hati: ‘A Ñala, nda ove muẽle, mañinye oku iya toke kokuove.’ Yesu wa sapuila Petulu hati: ‘Enju kokuange.’ Vokuenda kuehunguhungu Petulu wa loka vowato kuenje wa endela kilu liovava oku loña ku Yesu. Pole, osimbu Petulu a kala ocipepi loku pitĩla ku Yesu, wa luluvalela kehunguhungu liofela kuenje wa kuata usumba. Eye wa fetika oku vomba. Petulu wa kaluka hati: ‘A Ñala, mopele!’ Yesu wa kuata peka lia Petulu kuenda wo sapuila hati: ‘Momo lie wa kuatela atatahãi? Ekolelo liove li kasi pi?’

Yesu kuenda Petulu va londa vowato kuenje vepuluvi liaco, ehunguhungu lia tulumuha. O pondola hẽ oku sokolola ndomo ovapostolo va liyeva vutima? Ovo va popia vati: “Ocili, ove Vumõla a Suku.”

Eyi hayoko lika onjanja Yesu a tutuiya ehunguhungu. Vepuluvi likuavo, eci Yesu kumue lovapostolo va kala oku enda konele yikuavo yokalunga, Yesu wa pekela konyima yowato. Osimbu a kala oku pekela, kueya ehunguhungu limue linene. Kuenje akimba a fetika oku veta vowato kuenda owato weyukile lovava. Ovapostolo va pasula Yesu loku kaluka vati: ‘Olongisi, tu laika oku fa! Tu kuatise!’ Yesu wa votoka kuenda wa sapuila okalunga hati: “Tulumuha!” Vepuluvi liaco ofela kuenda okalunga via tulumuha. Yesu wa pula ovapostolo hati: “Ekolelo liene li kasi pi?” Ovo va fetika oku livangula pokati vati: “Ndaño ofela lokalunga vi pokola kokuaye.” Ovapostolo va lilongisa okuti nda va kolelele ku Yesu lutima wosi, nda ka va sukilile oku kuatela usumba ocina cimue.