Yesuusi sahettidaageeta pattiyoogaanne hayqqidaageeta denttiyoogaa xalla gidennan, i carkkuwaakka iraakka azazana danddayees. Yesuusi deriyaa bolli woossi simmidi, Galiila Abbaa duge xeellidi beetaa beˈiis. Kiitettidaageeti bantta wolwoluwan gelidi carkkoy carkkishin shaaroosona. Yesuusi duge wodhidi haattaa bollaara wolwoluwaakko hemettiyoogaa doommiis. Kiitettidaageeti issi uri haattaa bolli hemettiyoogaa beˈidi yayyidosona. SHin Yesuusi etayyo, ‘Tanattennee. Yayyoppite’ yaagiis.

PHeexiroosi, ‘Godawu, hegee nena gidikko, taani neekko baana mala, tana azaza’ yaagiis. Yesuusi PHeexiroosa, ‘Taakko haa ya’ yaagiis. Yaatiyo gishshawu, beetaa giddoora PHeexiroosi wolwoluwaappe wodhidi haattaa bollaara Yesuusakko hemettiis. SHin, PHeexiroosi akko matidi, beetaa xeellidi yayyiis. I muuhettiyoogaa doommiis. PHeexiroosi qaalaa xoqqu oottidi, ‘Godawu tana ashsha!’ yaagiis. Yesuusi a kushiyaa oyqqidi, ‘Neeni ayssi siriyoogaa doommadii? Ne ammanoy anee?’ yaagiis.

Yesuusinne PHeexiroosi wolwoluwaa giddo gelin, beetay sohuwaara woppu giis. Kiitettidaageetuyyo aybi siyettidaakko neeni qoppana danddayay? Eti, ‘Neeni tumuppe Xoossaa Naˈaa’ yaagidosona.

Yesuusi carkkuwaa azazidoy he wode xalla gidenna. Hara wode, Yesuusinne kiitettidaageeti abbaappe hefintti wolwoluwan biyo wode, Yesuusi wolwoluwan guyye baggaara xiskkiis. I xiskkidaashin, wolqqaama carkkoy denddiis. Beetay wolwoluwaa shocin, haattay wolwoluwaa kumiis. Kiitettidaageeti Yesuusa denttidi, ‘Tamaarissiyaagoo, nuuni hayqqoos! Nuna maadda!’ yaagidosona. Yesuusi beegottidi abbaa, ‘Coˈˈu ga’ yaagiis. Sohuwaara, carkkoynne abbay woppu giis. Yesuusi kiitettidaageeta ‘Intte ammanoy anee?’ yaagidi oychiis. Eti bantta giddon, ‘Goteenne abbaykka ayyo azazettoosona’ yaagidosona. Kiitettidaageeti eti Yesuusa wozanappe ammanidaakko, eti aybanne yayyana koshshennaagaa akeekidosona.