Jesosy nampajanga olo marary ndreky namelon̈o olo maty. Izy koa nahavita nikomandy tsiko ndreky mahalen̈y. Izy koa fa baka nivavaka tamy bongo, hitany fa nisy tsiko mare tamy Ranomasin̈y Galilia, kanefa iro apostoly aby io tan̈aty sambondro. Namango iro nivehy sambo fa sahiran̈a mare fotony tsiko naresaka. Nan̈aton̈o iro Jesosy, fa izy nandeha tan̈abony rano. Navozo iro apostoly aby io koa fa nahita olo nandeha tan̈abony rano. Jesosy ndraiky nivolan̈a tamindro: ‘Anaro aza mavozo, fa zaho fo ty.’

Ho Petera: ‘Tompoko anao, koa anao marin̈y io, iraha man̈aton̈o anao zaho.’ Ho Jesosy: ‘Mavia basy!’ Nasaky niala tan̈aty sambo io Petera nandeha tan̈abony rano, nan̈aton̈o Jesosy. Petera koa fa narikitry Jesosy, izy nizaha tsiko be io ke navozo. Nilentiky tan̈aty rano izy. Nandronton̈o Petera: ‘Tompoko anao, vonjia zaho!’ Nitrapainy Jesosy tan̈anany, volan̈iny: ‘Nan̈ino ma anao nanjary nisalasala? Aia finoan̈anao?’

Nanonga tamy sambo tao Jesosy ndreky Petera. Nijanon̈o koa tsiko. Akory eky nivolan̈indro apostoly aby io? Iro nivolan̈a: ‘Zanaka Zan̈ahary ankitin̈y anao!’

Tsy tamy zen̈y fo Jesosy nan̈ano raha karaha zen̈y. Tandraraiky, izy ndreky apostoly aby io niondran̈a sambo nitsaka tandaforeny ranomasin̈y zay. Nandeha nandry tafarany sambo io Jesosy taminio. Izy koa fa nandry in̈y, nisy tsiko naresaka koa. Nantompatompa niditry tan̈aty sambo tao rano, ke feno rano sambo io. Nifohaziny apostoly aby io Jesosy, iro nandronton̈o: ‘Papianatra, vonjia fa atsika kony maty e!’ Nifoha Jesosy, ke nivolan̈a tamy ranomasin̈y: “Mangìna!” Niaraka tamy zen̈y, nangin̈y jay tsiko be io, ndreky ran̈omasin̈y. Ho Jesosy tamindro apostoly aby io: ‘Aia finoan̈anaro?’ Iro nifampivolan̈a: “Tsiko ndreky ranomasin̈y zalahy mbala man̈araka raha volan̈iny.” Haindro apostoly aby io fa iro koa matoky Jesosy tsarabe, tsisy raha hampavozo iro.