XOOKIL 84
Jesuseʼ xíimbalnaj yóokʼol le jaʼoʼ
Jesuseʼ ku páajtal kaʼach u tsʼakik kʼojaʼanoʼob yéetel u kaʼa kuxkíintik kimenoʼob. Tsʼoʼoleʼ páajchaj xan u jetsʼik le iikʼ yéetel le jaʼoʼ. Ka tsʼoʼok u orar teʼ puʼukoʼ, Jesuseʼ paakatnaj tu tojil u Kʼáaʼnáabil Galileaeʼ ka tu yilaj táan junpʼéel kʼaʼamkach iikʼiʼ. U apostoloʼobeʼ tiaʼanoʼob kaʼach tiʼ junpʼéel barcoeʼ yéetel táan u remaroʼob tumen aktáan tiʼob ku taal le iikʼoʼ. Jesús túuneʼ éem teʼ puʼukoʼ ka joʼopʼ u xíimbal yóokʼol le jaʼ tu tojil le barcooʼ. Ka tu yilaj le apostoloʼob yaan máax ku xíimbal yóokʼol le jaʼoʼ jach sajakchajoʼob. Chéen baʼaleʼ Jesuseʼ tu yaʼalajtiʼob: ‹Teen, maʼ a chʼaʼikeʼex saajkil›.
Pedroeʼ tu yaʼalaj: ‹Yuumtsil, wa teecheʼ aʼalten ka taalaken ta wiknal›. Jesús túuneʼ tu yaʼalajtiʼ: ‹¡Koʼoten!›. Pedroeʼ éem teʼ barcooʼ ka joʼopʼ u bin xíimbalil yóokʼol le jaʼoʼ. Chéen baʼaleʼ le táan u náatsʼal yiknal Jesusoʼ tu yilaj jach kʼaʼam u yiikʼal le jaʼoʼ ka sajakchaji. Pedroeʼ joʼopʼ u búulul ka tu yawtaj: ‹Yuumtsil, salvarteniʼ›. Jesús túuneʼ tu machaj u kʼabeʼ ka tu yaʼalajtiʼ: ‹¿Baʼaxten kaʼapʼéelchaj a tuukul, minaʼan wa a fe?›.
Ka naʼak Jesús yéetel Pedro teʼ barcooʼ tu séebaʼanil jéetsʼ le kʼaʼamkach iikʼoʼ. ¿Bix a tuklik tu yuʼubiluba le apostoloʼoboʼ? Letiʼobeʼ tu yaʼaloʼob: ‹Jach tu jaajil u Paalech Dios›.
Maʼ yáax u beetik lelaʼ. Juntéenjeak le táan u bin Jesús yéetel u apostoloʼob tuláakʼ juntséel le kʼáaʼnáaboʼ, Jesuseʼ ween tu paachilil le barcooʼ. Chéen baʼaleʼ le táan u weenloʼ, káaj junpʼéel kʼaʼamkach iikʼ. Le barcooʼ táan kaʼach u jaʼajatsʼaʼal tumen u olasil le jaʼoʼ ka joʼopʼ u yokol jaʼ ichil. Le apostoloʼoboʼ tu yajsoʼob Jesuseʼ, ka tu yaʼaloʼobtiʼ: ‹¡J-kaʼansaj, táan k-búulul! ¡Áantoʼoniʼ!›. Jesuseʼ líikʼeʼ ka tu yaʼalaj tiʼ le kʼáaʼnáaboʼ: ‹¡Mak a chiʼ! ¡Jetsʼkúuntaba!›. Teʼ súutukoʼ jéetsʼ le kʼaʼamkach iikʼoʼ. Jesús túuneʼ tu kʼáataj tiʼ le apostoloʼoboʼ: ‹¿Minaʼan wa a fejeʼex?›. Letiʼobeʼ tu yaʼaloʼob tu baatsiloʼob: ‹¡Tak le iikʼ yéetel le kʼáaʼnáab uʼuyik u tʼaanoʼ!›. Le apostoloʼoboʼ tu kanoʼobeʼ wa jach ku confiaroʼob tiʼ Jesuseʼ maʼ unaj u sajaktaloʼob tiʼ mix baʼaliʼ.
«¿Tuʼux kaʼach jeʼel in wantal wa maʼ in kʼubmaj in wóol de ke yaan u yeʼesikten u yutsil Jéeoba mientras kuxaʼaneniʼ?» (Salmo 27:13)
Maʼ xaaneʼ jeʼel u yutstal xan ta wicheʼ
JESÚS: LE BEJOʼ, LE JAAJOʼ YÉETEL LE KUXTALOʼ
Juntúul gobernante ku páajtal u controlartik le jaʼ yéetel le iikʼoʼ
¿Baʼaxoʼob tu kanaj le apostoloʼob le úuchik u xíimbal Jesús yóokʼol le jaʼ yéetel úuchik u beetik u jéetsʼel le kʼaʼamkach iikʼoʼ?
YANAKTOʼON LE FE ANCHAJTIʼOBOʼ
Pedroeʼ xuʼul u chʼaʼik saajkil yéetel u kaʼapʼéeltal u tuukul
U kaʼapʼéeltal u tuukul máakeʼ jeʼel u beetik u bin kʼaasil tiʼeʼ. Baʼaleʼ Pedroeʼ úuchik u tsaypachtik Jesuseʼ xuʼul u chʼaʼik saajkil yéetel u kaʼapʼéeltal u tuukul.
LE MÁAX KU KANANOʼ (UTIAʼAL LE MÚUCHʼULILOʼ)
«Maʼ a péekeʼex tiʼ a fejeʼex»
¿Baʼax jeʼel k-kanik tiʼ le fe tu yeʼesaj Pedro yéetel le ka xíimbalnaj yóokʼol le jaʼoʼ?
