Farisi bi ɔmɛ sume Yesu sane, enɛ ɔ he ɔ, a hla nɔ́ ko nɛ a ma nyɛ maa da nɔ kɛ nu lɛ. Farisi bi ɔmɛ tsɔɔ kaa e sɛ nɛ Yesu nɛ tsa hiɔtsɛmɛ ngɛ He Jɔɔmi Ligbi ɔ nɔ. Ngɛ He Jɔɔmi Ligbi ko nɔ ɔ, Yesu na nyumu ko nɛ e hɛ ngmɛ yu, nɛ e ngɛ ní bae ngɛ blɔ he. Yesu de e kaseli ɔmɛ ke: ‘Nyɛɛ hyɛ bɔ nɛ Mawu he wami ɔ maa ye bua nyumu nɛ ɔ ha.’ Yesu ngɔ lɛ nitsɛ e lada kɛ pɔtɔ zu, nɛ e ngɔ zu ɔ kɛ kpa nyumu ɔ hɛ ngmɛ ɔmɛ a nɔ. Kɛkɛ nɛ Yesu de lɛ ke: ‘Yaa nɛ o ya fɔ o hɛ mi ngɛ Siloam taku ɔ mi.’ Nyumu ɔ ya pee jã, nɛ e bɔni nɔ́ hyɛmi. Kɛ je benɛ a fɔ lɛ ɔ, lɔ ɔ ji kekle ligbi nɛ e bɔni nɔ́ hyɛmi.

Nɔ́ nɛ ɔ pee nihi nyakpɛ nɛ a de ke: ‘Pi nyumu ɔ nɛ e hii sika bae ɔ? Aloo nɔ ko nɛ́ e je lɛ?’ Nyumu ɔ de mɛ ke: ‘Imi nɛ a fɔ mi hɛ yuyuilɔ ɔ nɛ!’ Ni ɔmɛ bi lɛ ke: ‘Mɛni ha nɛ piɔ ɔ, o ngɛ nɔ́ hyɛe ɔ?’ Benɛ e de ni ɔmɛ nɔ́ nɛ ba a, a ngɔ lɛ kɛ ho Farisi bi ɔmɛ a ngɔ ya.

Nyumu ɔ de Farisi bi ɔmɛ ke: ‘Yesu pɔtɔ zu, nɛ e kɛ kpa ye hɛ ngmɛ ɔmɛ a nɔ, nɛ e de mi ke ma ya fɔ ye hɛ mi. I pee jã, nɛ piɔ ɔ, i ngɛ nɔ́ hyɛe.’ Farisi bi ɔmɛ de ke: ‘Ke Yesu tsa nɔ ko ngɛ He Jɔɔmi Ligbi ɔ nɔ ɔ, lɛɛ tsa pi Mawu nɛ e ha lɛ he wami ɔ.’ Se ni komɛ hu de ke: ‘Ke tsa pi Mawu nɛ e ha lɛ he wami ɔ, jinɛ e be nyɛe ma tsa nɔ ko.’

 Farisi bi ɔmɛ tsɛ nyumu ɔ fɔli, nɛ a bi mɛ ke: ‘Mɛni ha nɛ piɔ ɔ, nyɛ binyumu ɔ ngɛ nɔ́ hyɛe ɔ?’ E fɔli ɔmɛ ye gbeye ejakaa Farisi bi ɔmɛ deɔ ke nɔ fɛɛ nɔ nɛ e heɔ Yesu yeɔ ɔ, a maa fiee lɛ kɛ je kpe he ɔ. Enɛ ɔ he ɔ, a de Farisi bi ɔmɛ ke: ‘Wa li. Nyɛ bi lɛ nitsɛ.’ Farisi bi ɔmɛ bi nyumu ɔ sanehi fuu kɛ ya si benɛ e de mɛ ke: ‘I de nyɛ nɔ́ fɛɛ nɔ́ momo. Mɛni he je nɛ nyɛ ngɛ mi sane kake nɛ ɔ bie kpamisa a?’ Farisi bi ɔmɛ a mi mi fu, nɛ a fiee lɛ kɛ je lejɛ ɔ.

Yesu ya hla nyumu ɔ, nɛ e bi lɛ ke: ‘Anɛ o ngɛ hemi kɛ yemi ngɛ Mesia a mi lo?’ Nyumu ɔ de lɛ ke: ‘Ke i le nɔ nɛ ji Mesia a, ma ná hemi kɛ yemi ngɛ e mi.’ Yesu de nyumu ɔ ke: ‘Imi ji Mesia a nɛ.’ Anɛ enɛ ɔ tsɔɔ we kaa Yesu mi mi hi lo? Yesu tsa nyumu ɔ, nɛ e ye bua lɛ nɛ e ná hemi kɛ yemi ngɛ e mi.