Lôk Farisai i bé oo Yésu, i yéñék manjel i gwel nye. Ba bé kal le a gwé bé kunde i mbuubaha bôt i kel Sabat (tole Ngwa noi). Ngwa noi wada, mu njel, Yésu a boma mut njagi nu a bé ndim. A kal banigil bé le: ‘Ni tehe lelaa ngui Djob i ga hôla i mut nunu.’ Yésu a pôdna matai mé ni biték, bi yila ndobo, a hoo yo i mis ma mut ndim. Ndi Yésu a kal nye le: ‘Ke jôwa mis moñ i titimba Silôam.’ Kiki a mal boñ hala, mis mé ma yibla, a kahal tehna inyu ngélé yé bisu.

Jam li, li bi yumus bôt. Ba kal le: ‘Baa mut nunu bé nyen a bé a yii hana, a yaglak bôt, tole pôna ndik i?’ Ndi mut nu a timbhe bo le: ‘Me nu, me yaga nyen me bi gwéé ndim!’ Limut li bat nye le: ‘Inyuki u ta ha bé ndim?’ A kal bañ bo kii i bi pémél nye, ba kena nye yak Farisai.

Mut a kal Farisai le: ‘Yésu a bi hoo me ndobo i mis, ndi a kal me le me ke, me jôwa mo. Me boñ hala, ndi nano me nla ntehna.’ Farisai i kal le: ‘Ibale Yésu a mbuubaha mut i Ngwa noi, wee ngui yé i nlôl bé ni Nyambe.’ Ndi bôt bape ba bé kal le: ‘Ibale ngui yé i lôlak bé yak Nyambe, ki a nla bé mbuubaha bôt.’

Farisai i sébél bagwal ba mut nu, i bat bo le: ‘Kii i mbôña inyu boñ le man nan a nla tehna nano?’  Bagwal bé ba kon woñi i pot maliga, inyule Farisai i bi kal le ibale mut a nhémle Yésu, ba ga héa nye i ntôñ. Jon ba bi timbhe le: ‘Di nyi bé. Bébomede ni bat nye.’ Farisai i bi bat mut nu ngandak mambadga, kayéle a sôk a timbhe bo le: ‘Me ñañle bé mam momasôna me nyi. Inyuki ni nginda badak me mambadga?’ Ikété ngandak hiun, Farisai i leñ nye i mbédgé.

Yésu a bi yéñ mut nu; ngéda a bi boma nye, a bat nye le: ‘Baa u nhémle Mésia?’ Mut a timbhe le: ‘Ibale me yik njee a yé Mésia, ki me nhémle nye.’ Yésu a kal nye le: ‘Men me yé Mésia.’ Baa Yésu a bi unda bé le a yé loñge mut? A bi mélés ndik bé nye kon wé, ndi Yésu a bi hôla yak mut nu i bana hémle.