Yezu koo tun ka gwo Fariziɲɛw ye ani u tun be sababu ɲinina k’a minɛ. U tun b’a fɔ ko a man kan ka banabagatɔw kɛnɛya lafiɲɛlon na. Lafiɲɛlon dɔ, Yezu ye fiyentɔ darikɛla dɔ ye sirada la. Yezu y’a fɔ a ka kalandenw ye ko: ‘Aw y’a filɛ Ala ka sebagaya bena min kɛ cɛɛ nin ye.’ Yezu ye bɔgɔ ɲigi n’a daji ye, k’o cɛ k’a mɔ cɛɛ ɲɛɛw na. Yezu y’a fɔ a ye ko: ‘Taga i ɲɛɛw ko Silowe jii la.’ Cɛɛ y’o kɛ. O kɔ, a sera ka yeli kɛ. A siɲɛ fɔlɔ tun lo ka yeli kɛ kabi a wolola.

O koo barila mɔgɔw la. U ko: ‘Cɛɛ min tun be to ka sigi ka dari kɛ, ale tɛ wa? Wala mɔgɔ wɛrɛ lo min bɔnin b’a ma wa?’ Cɛɛ ko: ‘Ne lo, min fiyentɔman wolola!’ Mɔgɔw y’a ɲininga ko: ‘A sɔrɔla di i ɲɛɛw fiyennin tɛ tugun?’ Tuma min na a y’a fɔ u ye min kɛra, u y’a minɛ ka taga n’a ye Fariziɲɛw fɛ.

Cɛɛ y’a fɔ Fariziɲɛw ye ko: ‘Yezu ye bɔgɔ ɲigi k’a mɔ n’ ɲɛɛw na ani k’a fɔ n’ ye ko n’ ka taga u ko. N’ y’o kɛ ani n’ be yeli kɛra sisan.’ Fariziɲɛw ko: ‘Ni Yezu be mɔgɔw kɛnɛya lafiɲɛlon na, o kɔrɔ ko a ka fanga ma bɔ Ala la.’ Nka mɔgɔ wɛrɛw ko: ‘ N’a ka fanga tun ma bɔ Ala la, a tun tɛna se ka mɔgɔ si kɛnɛya.’

Fariziɲɛw ye cɛɛ wolobagaw weele k’u ɲininga ko: ‘A sɔrɔla di aw  dencɛ be yeli kɛra sisan?’ Cɛɛ wolobagaw siranna sabu Fariziɲɛw tun ko mɔgɔ min bena la Yezu la, o tigi tɛna a seen don batoso kɔnɔ tugun. O kama, u ko: ‘An t’o lɔn. Aw ka a yɛrɛ ɲininga.’ Fariziɲɛw tora ka cɛɛ ɲininga fɔɔ a labanna k’a fɔ ko: ‘ N’ be min lɔn, n’ y’o bɛɛ fɔ aw ye. Mun na aw bele be n’ ɲiningara?’ Fariziɲɛw dimina. U ye cɛɛ gwɛn.

Yezu tagara cɛɛ sɔrɔ ani a y’a ɲininga ko: ‘I lanin be Masiya la wa?’ Cɛɛ ko: ‘Ni n’ tun b’a lɔn, n’ tun bena la a la.’ Yezu ko: ‘Ne lo ye Masiya ye.’ Yezu ka ɲi dɛ! A ye cɛɛ kɛnɛya. Nka a ma dan o dɔrɔn ma. A y’a dɛmɛ fana ka kɛ ni limaniya ye.