Orang Parisi begedika Jesus lalu deka ngiga jalai kena nangkap iya. Ku sida, Jesus enda patut ngeraika orang sakit ba hari Sabat laban nya hari kena belelak. Bisi sekali ba hari Sabat, Jesus betemu enggau seiku lelaki buta ke minta sedekah ba jalai. Ku Jesus madah ngagai bala rasul iya: ‘Peda meh baka ni kuasa Petara deka nulung orang tu.’ Jesus nyampur liur iya enggau tanah liat, lalu ngunsutka tanah liat nya ba mata lelaki nya. Jesus madah ngagai iya: ‘Mupuk nuan, lalu basu mua nuan ba Letung Siloam.’ Orang nya mupuk masu mua diri lalu keterubah kali iya ulih meda.

Orang mayuh tekenyit. Ku sida: ‘Ukai enda iya tu ke selalu duduk minta sedekah? Tauka orang ke sama gamal enggau iya?’ Ku lelaki nya nyaut: ‘Aku meh ke ada buta nya!’ Orang nanya iya: ‘Baka ni nuan diatu ulih meda?’ Pengudah iya madah utai ti nyadi, sida lalu mai iya ngagai orang Parisi.

Lelaki nya madah ngagai orang Parisi: ‘Jesus ngengkahka tanah liat ba mata aku lalu ngasuh aku masu mua, udah nya aku ulih meda.’ Ku orang Parisi: ‘Enti Jesus ngeraika orang ba hari Sabat, kuasa iya tentu ukai ari Petara.’ Tang ku orang bukai: ‘Enti kuasa iya ukai datai ari Petara, iya tentu enda ulih ngeraika orang.’

Orang Parisi ngangauka apai indai lelaki nya lalu nanya: ‘Baka ni ku anak  seduai ulih meda diatu?’ Apai indai iya takut laban orang Parisi kala madah barang sapa ti arapka Jesus deka dibuai ari balai gempuru. Nya alai, sida madah: ‘Kami enda nemu. Tanya iya empu.’ Orang Parisi nanya lelaki nya mayuh agi tanya nyentukka iya madah: ‘Aku udah madahka semua utai ngagai kita. Nama kebuah kita majak nanya?’ Orang Parisi ringat lalu muai iya pansut.

Jesus mupuk ngiga lelaki nya, lalu nanya iya: ‘Kati nuan arapka Messiah?’ Ku lelaki nya: ‘Au, enti aku nemu sapa iya.’ Ku Jesus: ‘Aku meh Messiah.’ Enda ke tu nunjuk pemanah ati Jesus? Iya ukai semina ngeraika lelaki nya tang nulung iya ngembuan pengarap.