Avalisi nĩmamenete Yesũ na mamanthaa itumi sya kũmũkwata. Maasya kana Yesũ ndaĩle kũvosya awau mũthenya wa Savato. Mũthenya ũmwe waĩ wa Savato, Yesũ nĩweethĩie mũndũ waĩ kĩlalinda nzĩanĩ aivoya ũtethyo. Yĩla woonie mũndũ ũsu, eeie amanyĩwʼa make atĩĩ: ‘Sisyai mwone ũndũ vinya wa Ngai ũũtetheesya mũndũ ũũ.’ Ĩtina wa ũu Yesũ nĩwatwʼĩlile mata nthĩ na aseũvya kataka, na ĩndĩ avaka mũndũũme ũsu metho. Yesũ amina kwĩka ũu eeie mũndũ ũsu atĩĩ: ‘Enda ũkathambe metho ndianĩ ya Siloami.’ Mũndũũme ũsu nĩweekie ũu, na ambĩĩa kwona ataĩ aaona ĩngĩ.

Andũ moona ũu nĩmatelemile mũno. Makũlanasya atĩĩ: ‘Ũũ nĩ ũla mũndũ ũnekalaa nzĩanĩ aivoya, kana nĩ mũndũ ũngĩ mavwʼanene?’ Yĩla mũndũ ũsu weewie maineena ameie atĩĩ: ‘Nyie nasyaiwe nĩ kĩlalinda.’ Namo andũ asu mamũkũlya: ‘Na mbona yu nũkwona nthĩ?’ Yĩla wamatavisye kĩla kĩkĩkie, mamũtwaĩie vala ve Avalisi.

Yĩla mavikie vala ve Avalisi mũndũũme ũsu ameie atĩĩ: ‘Yesũ ambakie kataka metho na ambĩa nĩthi ngathambe. Na yĩla nĩkie ũu, nambĩĩa kwona.’ Namo Avalisi masya: ‘Ethĩwa Yesũ nũvoasya mũthenya wa Savato, vinya wake ndumĩte kwa Ngai.’ Ĩndĩ andũ angĩ maasya: ‘Keka vinya wake ndumĩte kwa Ngai, ndethĩwa atonya kũvosya mũndũ o na ũmwe.’

 Ĩtina wa ũu, Avalisi nĩmeetie asyai ma mũndũ ũsu na mamakũlya: ‘Mwana wenyu ekie ata nĩ kana ambĩĩe kwona?’ Asyai asu maĩ na wia mũno nũndũ Avalisi maĩtye kana mũndũ ũla ũkamũĩkĩĩa Yesũ akalũngwʼa ĩsinakokenĩ. Kwoou masũngĩa Avalisi mamea: ‘Ithyĩ tũyĩsĩ. Mũkũlyei.’ Ĩtina wa ũu Avalisi makũlilye mũndũũme ũsu makũlyo maingĩ nginya amea: ‘Nĩnĩmũtavisye maũndũ onthe ala nĩsĩ. Mũtindĩie ũngũlya kyaũ?’ Nũndũ wa ũu, Avalisi nĩmathatie na mamwĩkya nza.

Yesũ nĩwaendie kũmantha mũndũ ũsu na amũkũlya: ‘We nũmũĩkĩĩa Masia?’ Nake mũndũũme ũsu amũsũngĩa: ‘Kethĩwa nĩnĩmwĩsĩ no nĩmũĩkĩĩe.’ Ĩtina wa ũu Yesũ amwĩa: ‘Nyie ninyie Masia.’ Ũndũ ũsu wĩonanyʼa kana Yesũ e ĩnee, ti wʼo? O vamwe na kũvosya mũndũ ũsu, Yesũ nĩwamũtetheeisye eethĩwa na mũĩkĩĩo.