Parisi ro rar dike Jesus im rar kõn̦aan kõm̦m̦an ruõn bwe en kalbuuj. Rar ba ñane bwe en jab kõmour armej jãn nañinmej ko aer ilo raanin Jabõt. Juon Jabõt, Jesus ear iioone juon em̦m̦aan epilo me ekõn pãd iturin ial̦ ko im owar armej. Jesus ear ba ñan rũkal̦oor ro an: ‘Kom̦win lale wãween an kajoor eo an Anij jipañ em̦m̦aan in.’ Ear iiõke jidik bwidej kõn kaplo in make im iri ñan mejãn ripilo eo. Im ear ba ñane: ‘Kwõn etal im kwal̦ mejam̦ ilo l̦we in Siloam.’ Em̦m̦aan eo ear kõm̦m̦an ãinwõt an ba, innem ear jako an pilo. Jãn ke ear l̦otak ñan kiiõ, ej kab maroñ lol̦o̦kjen̦.

Armej ro rar lukkuun bwilõñ kõn em̦m̦aan eo. Rar ba: ‘Ejjab em̦m̦aan eo in ekõn pãd turin ial̦ im oware armej ke? Ke ta juon wõt e armej ak ãin jekjekin wõt em̦m̦aan eo epilo?’ Innem em̦m̦aan eo ear ba: ‘Ña l̦eo ear l̦otaktok im pilo!’ Armej ro rar kajjitõk ippãn: ‘Ak etke ejako am̦ pilo kiiõ?’ Ke ear ba ñan er kõn ta eo ear wal̦o̦k, armej ro rar bõkl̦o̦ke ñan ippãn Parisi ro.

Em̦m̦aan eo ear ba ñan Parisi ro: ‘Jesus ear iri meja kõn bwidej im ear jiroñ eõ bwe in etal im kwal̦e meja. Im iar kõm̦m̦ane ãinwõt an ba, im kiiõ imaroñ lol̦o̦kjen̦.’ Innem Parisi ro rar ba: ‘El̦aññe Jesus ej kõmour ilo raanin Jabõt, eokwe kajoor en̦ an ejjab itok jãn Anij.’ Ak jet rar ba: ‘El̦aññe kajoor eo an ejjab jãn Anij, innem eban kar maroñ kõmour armej jãn nañinmej ko aer.’

Parisi ro rar kũrtok jinen im jemãn em̦m̦aan eo ear pilo im rar kajjitõk ippãerro: ‘Etke em̦m̦aan  in nejimiro emaroñ lol̦o̦kjen̦?’ Rũtto ro jinen im jemãn rar mijak kõnke Parisi ro rar ba bwe jabdewõt eo enaaj tõmak Jesus, naaj jol̦o̦ke jãn im̦õn kabuñ eo. Kõn men in, erro kar ba: ‘Kõm̦ro jaje. Kom̦win make kajitũkini.’ Parisi ro rar kajjitõk ippãn em̦m̦aan eo elõñ kajjitõk ko m̦ae iien ej kab ba ñan er: ‘Em̦õj aõ kar ba waj aolep men ko iar jel̦ã kaki. Etke kom̦ij pãddo kajitũkin eõ?’ Parisi ro rar illu im kadiwõje nabõjl̦o̦k.

Jesus ear etal im pukote em̦m̦aan eo im ear kajjitõk ippãn im ba: ‘Kwõj ke tõmak ilo Messaia eo?’ Em̦m̦aan eo ear ba: ‘Aet, inaaj el̦aññe ijel̦ã wõn e.’ Jesus ear ba ñane: ‘Ña Messaia eo.’ Men in ej kwal̦o̦k an kar Jesus lukkuun jouj. Ear jab baj kõmour wõt em̦m̦aan eo ak ear bar jipañe bwe en wõr an tõmak.