Fariziẽ-rãmbã ra kisa a Zeezi, hal n da rat t’a maan yell tɩ b paam n yõk-a. B yeelame t’a pa segd n sãoog ned vʋʋsg daare, bala ned pa segd n tʋm vʋʋsg daar ye. Vʋʋsg daar a ye, a Zeezi yãa rao sẽn dog ne zondo, n zĩ sorã noor n bõosdẽ. A yeela a karen-biisã yaa: ‘Ges-y Wẽnnaam sẽn na n sõng rao wã to-to.’ A tʋbsa kolkoodo, n kalem ne tom n yãk n bɛ rao wã ninã, n yeel-a yaa: ‘Kẽng Silowe bãkẽ wã n tɩ widg f nengã.’ Rao wã maana woto, la a ninã pukame. A sẽn dog tɛka, a zɩ n yã ye.

Nebã yɛɛsame, n yeel yaa: ‘Pa rao-kãngã la sẽn da be sorã noor n bõosdẽ wã, bɩ yaa ned sẽn wõnd-a?’ Rao wã yeelame: ‘Yaa maam bala.’ Nebã sok-a lame yaa: ‘Maana wãn tɩ fo ninã puki?’ A sẽn togs-b bũmb ning sẽn maanã, b tall-a lame n kẽng Fariziẽ-rãmbã nengẽ.

Rao wã yeela Fariziẽ-rãmbã yaa: ‘A Zeezi bɛɛ mam ninã ne tãndo, n yeel tɩ m tɩ widg m nengã. Mam tɩ widgame, tɩ m ninã puki.’ Fariziẽ-rãmbã yeelame: ‘A Zeezi sã n sak n sãooga ned vʋʋsg daare, dẽnd pa Wẽnnaam n kõt-a tõog ye.’ La neb a taabã yeelame: ‘Sã n pa Wẽnnaam n kõt-a tõogo, a ra pa na n tõog n sãoog ned ye.’

Fariziẽ-rãmbã boola rao wã baaba ne a ma n sok-b  yaa: ‘Maana wãn tɩ yãmb biigã nin puki?’ B yɛɛsame, bala Fariziẽ-rãmbã ra yeelame tɩ ned sã n yeel t’a tẽeda a Zeezi, b na n diga a soab n yiis karen-doogẽ wã. Rẽ n so t’a roagdbã leok yaa: ‘Tõnd ka mi ye. Sok-y yẽ mengã.’ Fariziẽ-rãmbã soka rao wã sogsg wʋsgo, hal t’a wa yeel-b yaa: ‘Mam togsa yãmb zãnga. Yaa bõe tɩ yãmb ket n sokd maam?’ Fariziẽ-rãmbã sũy yikame, tɩ b rig-a n yiisi.

A Zeezi wa n yãa rao wã, n sok-a yaa: ‘Fo tẽeda Mesi wã bɩ?’ Rao wã leokame yaa: ‘M sã n da mi-a, m na n tẽ-a lame.’ T’a Zeezi yeel-a yaa: ‘Yaa maam la Mesi wã.’ A Zeezi pa nin-sõng sɩda? A sãooga rao wã, la a sõng-a t’a paam tẽebo.