VaFarisi vainyenya Jesu zve vaida kupsaka mathangwe kuti vamuuraye. Ivona vainanga kuti iyena aacaidikana kurapa vandhu mu Sabudu. Pa rimwe Sabudu, Jesu wakawanana no rimwe bofu recipembha. Iyena wakabvunja vajiji vake kuti: ‘Vonanyi kuti simba ra Mwari rinozomubesera kudini mundhu uwu.’ Jesu wakapfira mata wokanya-kanya dongo zve wozoja mu majiso o mwanarumewo. Jesu wakamubvunja kuti: ‘Endai wosamba mu mwimbo wo Sirowe.’ Mwanarume uwo wakaenda koita kudaro zve kubvira pondhopo wakatanga kuvona pakutanga mu upenyu hwake.

Vandhu vakakahamara maningi. Ivona vakati: ‘Asipi wiyana waigara pasi ecipembha, kana mundhu wakafanana naye?’ Perapo mwanarume wiya wakati: ‘Ndini kamare!’ Vandhu vakamubvunjisa kudari: ‘Zvakaitikisa kudini kuti uvone?’ Paakavabvunja zvaainga zvaitika, ivona vakamutora voenda nae ku vaFarisi.

Mwanarume wakabvunja vaFarisi kuti: ‘Jesu wakakanya dongo zve wozoja majiso angu perepo wondibvunja kuti ndiende kosamba meso. Pondakaita zvondhozvo ndakatanga kuvona.’ VaFarisi vakati: ‘Kudari Jesu wakakurapa mu Sabudu simba rake aribvi kuna Mwari.’ Asi vamweni vakati: ‘Kudari simba rake aricaibva kuna Mwari, iyena aacaizokwanisepi kumurapa.’

VaFarisi vakadanija vabari vo mwanarume wondhowo zve vobvunjisa kuti: ‘Zvakaitisa kudini kuti mwana wenyu  atange kuvona?’ Vabari vakona vainga vecithya ngo kuti vaFarisi vainga vananga kuti ari wese waitenda Jesu waizobviswa mu sinagoga. Ngo kudaro vakati: ‘Atizvizivi. Bvunjisanyi iyena.’ VaFarisi vakaita mwanarume wondhowo mubvunjo jakawanda mbhera iyena wonanga kuti: ‘Ndamubvunja zvese zvandinoziva. Ngenyi muri kuramba mucindiita mubvunjo?’ VaFarisi vakacamwa zve vakamubvisa musinagoga.

Jesu wakapsaka mwanarume wondhowo zve wakamubvunja kuti: ‘Unotenda Mesia?’ Mwanarume wakati: ‘Ndaizomutenda kudari ndaimuziva.’ Jesu wakati: ‘Ndini Mesia.’ Jesu wainga mundhu wakanaka, asipi zvona? Iyena aazivi kurapa mwanarumewo basi iyena wakamumbesa kuti ave no rutendo.