О фарисеија мрзинена сине е Исусе хем родена сине причина те астарен ле. Ола вакерена сине кај на смејнела те сасљарел насвален ки сабота, ко диве башо одмор. Јекх сабота, о Исус дикхља јекхе короле сар мангела песке ки улица. Тегани вакерѓа пле учениконге: „Дикхен сар е Девлескири сила ка сасљарел акале мануше“. Тегани о Исус чхунгарѓа ки пхув, таро адава керѓа чик хем лаја макхља о јакхја е манушескере. Пало адава вакерѓа леске: „Џа, тхов те јакхја ко езеро Силоам“. Откеда керѓа акава, о мануш шај сине прво пути ко живото те дикхел.

О мануша нашти сине те верујнен ко акава. Ола вакерѓе: „Акава ли тано о мануш со бешела хем мангела песке сине, или само личинела ки лесте?“ Ов пхенѓа ленге: „Ме сиум адава. Таро бијанибе сиум короло, ама акана дикхава!“ О мануша пучле ле: „А сар шај акана те дикхе?“ Кеда вакерѓа ленге со уло, ола ингарѓе ле ко фарисеија.

О мануш вакерѓа е фарисејенге: „О Исус чхивѓа манге чик ко јакхја хем вакерѓа манге те џав те тховав ме јакхја. Ме шунѓум ле, хем акана аке, дикхава“. О фарисеија вакерѓе леске: „Ако о Исус сасљарела ки сабота, тегани и моќ лескири на авела таро Девел“. Ама, о јавера вакерѓе: „Ако и моќ лескири на авела таро Девел, тегани ов ка нашти сине те сасљарел“.

 О фарисеија викинѓе е манушескере родителен хем пучле лен: „Сар шај тумаро чхаво акана те дикхел?“ Ола дарандиле соске о фарисеија заканинѓе пе кај секој со ка верујнел ко Исус ка овел исклучимо тари синагога. Адалеске вакерѓе: „На џанаја. Пучен ле“. О фарисеија понадари да пучена сине е мануше, хем ко крајо ов вакерѓа ленге: „Ама вакерѓум туменге са со џанава. Соске панда пучена ман?“ О фарисеија бут хољанѓе хем фрдинѓе ле аври.

О Исус аракхља акале мануше хем пучља ле: „Верујнеа ли ко Месија?“ Ов вакерѓа: „Те џанав сине кој адава, ка верујнав сине“. О Исус вакерѓа леске: „Ме сиум о Месија“. Кобор шукар сине о Исус! На само со сасљарѓа е мануше, него поможинѓа ле те овел ле вера ки лесте.