O fariseja mrzindže e Isuse hem rodindže razlog te astaren lje. On phendže so ov na ismini te sačari e nabormen ko sabat. Jekhvar, ko sabat, o Isus dikhlja jekhe korore manuše sar mangela ki ulica. Tegani phendža peklje učenikonendže: „Dikhen sar e Devljesi sila ka sačari akalje manuše.“ Tegani o Isus čhungardža ki phuv, kotar odova čerdža čik hem odoljeja makhlja e manušese jačha. Palo odova, o Isus phendža ljese: „Dža, thov te jačha ko jezero Siloam.“ O manuš čerdža adžahar hem palo odova prvo puti ko poklo dživdipe ov šajindža te dikhel.

O manuša naštindže te verujinen ko odova. On phendže: „Da li tano akava o manuš kova bešlja hem manglja pare, ili samo izgledini sar oljeste?“ Ov phendža ljendže: „Me hijum odova. Bijandiljum kororo, ama akana dikhava!“ O manuša pučlje lje: „A sar šaj akana te dikhe?“ Ked phendža ljendže so ulo, on igardže lje ko fariseja.

O manuš phendža e farisejendže: „O Isus čhivdža maje čik ko jačha hem phendža mandže te džav te thovav me jačha. Me čerdžum odova, hem akana dikhava.“ O fariseja phendže ljese: „Ako o Isus sačardža ko sabat, tegani oljeso zoraljipe na avela ando Devel.“ Ama, avera phendže: „Ako oljeso zoraljipe na avela ando Devel, tegani ov našti te sačari nikas.“

 O fariseja vičindže e manušese roditeljen hem pučlje ljen: „Sar šaj tumaro čhavo akana te dikhel?“ On darandilje sose o fariseja phendže so svako ko verujini ko Isus ka ovel isključimo andi sinagoga. Odoljese phendže: „Na džanaja. Pučen olje.“ O fariseja pučlje e manuše but buča, hem ko krajo ov phendža ljendže: „Phendžum tumendže sa so džanava. Sose paljem pučena man?“ O fariseja but holjandže hem paldindže lje.

O Isus arakhlja akalje manuše hem pučlja lje: „Da li verujineja ko Mesija?“ Ov phendža: „Te džanav koj tano, ka verujinav koro ljeste.“ O Isus phendža ljese: „Me hijum o Mesija.“ Kobor šukar hine o Isus! Na samo so sačardža e manuše, nego hem pomožindža lje te ovel lje vera.