Nalaigne i Jesosy o Fariseò, le natao iareo ze hitsepahagne aze. Nao zao tsy toko’e hagnasitragne ty Jesosy naho fa Sabata. Nahatrea ndaty goa nangatake tan-dalagney ty Jesosy, tamy Sabata raike zay. Le hoe ty Jesosy tamy i mpiana’e rey: ‘Henteo’areo fa hagnampe ty lahilahy tiagne ty hery i Jehovah.’ Nandrora tamy i taney eo ty Jesosy, le nafangaro’e tamy ty ive’e i taney sady napite’e tamy ty maso i goay. Le hoe reke: ‘Sasao an-tsihana i Siloamay agne o maso’ò.’ Nanao izay i lahilahỳ, le nahatrea.

Nigaga iaby i ndaty rey, le hoe iareo: ‘Tsy i lahilahy mpangatakey vao itiagneo, sa ndaty manahake aze avao?’ Hoe i lahilahỳ: ‘Izaho i goa boake an-troke agney!’ Le hoe i ndaty rey: ‘Akore ty nampahatrea azo?’ Nambara’e iareo ty raha niseho, le nente iareo tamo o Fariseò agne reke.

Le hoe i lahilahỳ tamy i Fariseo rey: ‘Nihosora i Jesosy raha i masokoy, le nampanasae’e ahy, le nahatrea amy izay raho.’ Hoe i Fariseo rey: ‘Tsy boake aman’Andrianagnahare ty hery i Jesosy kanao magnasitragne amy ty andro Sabata.’ Faie hoe ty ila’e tie: ‘Tsy ho nahavita izay reke naho tsy boake aman’Andrianagnahare ty heri’e.’

 Nagnontenea i Fariseo rey ty rae aman-drene i lahilahỳ tie: ‘Akore ty nahatreava o ana’areò?’ Faie natahotse iareo, satria fa nirehake i Fariseo rey tie horoahegne tsy ho amy i synagogay ao ze mino i Jesosy. Le hoe iareo: ‘Tsy fanta’ay fa agnonteneo aze.’ Nagnontane i lahilahỳ mateteke iareo, faie hoe reke: ‘Fa rinehako ama’areo anio. Ino ka ty mbe tea’areo ho fantatse?’ Boseke i Fariseo rey, le natora iareo an-tane agne reke.

Nipay i lahilahỳ ty Jesosy, le nagnontane aze tie: ‘Mino i Mesia vao rehe?’ Hoe i lahilahỳ: ‘Mino raho naho fantako tie ia reke.’ Hoe ty Jesosy: ‘Izaho ro Mesia.’ Soa fagnahy ty Jesosy, fa nagnasitragne i lahilahỳ ro mbe nagnampe aze hanam-pinoagne.