Ja fariseoʼik yilkʼujolane ja Jesús sok sleʼawe modo bʼa syamjel. Wa xyalawe mi xbʼobʼ stojbʼes ja matik maloʼayi bʼa skʼakʼujil sábado yujni skʼakʼujil jijlel. Jun sábado, ja Jesús yila jun winik tupel ja sati bʼa wan skʼanjel limosna ja bʼa calle. Ja yuj yala yabʼ ja snebʼumaniki: «Kʼelawik jastal ja yip ja Dyos oj skolta ja winik it». Anto ja Jesús swotsʼo ja luʼumi soka yaʼal stiʼ bʼa skʼulajel lokok. Tixa sjaxayi tʼusan bʼa sat ja winiki sok yala yabʼ: «Kaʼax sok sakʼa jawa sat ja bʼa poso bʼa Siloam». Jachni skʼulan ja winiki sok bʼobʼ yil kʼinal sbʼajtanil ekʼele ja bʼa sakʼanil.

Ja ixuk winik jel chamyilawe sok yalawe: «¿Anke yeʼn ja winik it ja maʼ wa xkʼulani skʼanjel limosna? ¿Ma pilan maʼ oj slaje?». Ja yeʼn sjakʼa: «Keʼna ja winik maʼ tupel ja sat pojki». Ti sjobʼoweyi: «¿Jas yuj mixa tupeluk jawa sati?». Ja yeʼn xcholo ja jas ekʼeli. Anto yiʼaje och bʼa xcholjelyabʼ ja fariseoʼik.

Ja winiki xcholo yabʼ ja fariseoʼik: «Ja Jesús sjaxaki lokok ja bʼa jsati sok yalakabʼ oj jsakʼe. Jachni jkʼulan sok ja wego wanxa xkila kʼinal». Ja fariseoʼik kʼe yal sbʼaje: «Ta ja Jesús wa x-ajnani bʼa sábado, mi ti wa xjak bʼa Dyos ja yipi». Pe tuk wa xyalawe: «Ta mi ti wa xjak bʼa Dyos ja yipi, anto ¿jas yuj wa xbʼobʼ ajnanuk?».

Ja fariseoʼik sjekawe spayjel ja snantat ja winiki sok sjobʼoweyi: «¿Jastal lek wanxa xbʼobʼ yil kʼinal  jawa keremexi?». Ja snantat wa xiwye yujni ja fariseoʼik yaluneje chikan maʼ wa skʼuʼan bʼa Jesús oj snutse el ja bʼa sinagoga. Ja yuj sjakʼawe: «Mi xnaʼatikon. Jobʼowikyi weʼnlex». Ja fariseoʼik yaweyi mas sjobʼjel ja winiki, sok ja yeʼn sjakʼa: «Kalata spetsanil ja jas wa xnaʼa. ¿Jas yuj wanexto sjobʼjelki masi?». Ja fariseoʼik tajkiye sok snutsuwe ele.

Tsaʼan, ja Jesús waj yil ja winiki sok sjobʼoyi: «¿Wan maʼ xa kʼuʼan sbʼaja Mesías?». Ja winik sjakʼa: «Lek wanukxta xnaʼa machunkiluk, ojni jkʼuʼuk». Ja Jesús yala yabʼ: «Keʼnon ja Mesías». ¿Anke lekni yila ja Jesús ja winik jaw? Mi kechan yajnay, cha skoltay bʼa oj ajyukyuj skʼuʼajel.