Abafalisaayo baharanaga Yesu kandi baserraga omulingo ogw’okumukwata. Bakamugambira ngu atalikiza abantu ha kiro kya Sabiiti. Sabiiti emu, Yesu akasanga omusaija omufu wa maiso ha muhanda aliyo nasabiiriza. Akagambira abegeswa be ati: ‘Murole omulingo amaani ga Ruhanga garakonyera omusaija onu.’ Yesu akakwata itaka yataburamu ebincwanta bye kandi yalisiiga ha maiso g’omusaija. Hanyuma, Yesu akamugambira ati: ‘Genda omu kiijongo kya Siroamu onaabye amaiso gaawe.’ Kinu nikyo omusaija onu yakozere kandi kwiha obu akatandika kuhweza.

Abantu bakahunirra muno. Kandi batandika kugambirangana bati: ‘Onu nuwe omusaija ayasabirizaaga, rundi muntu ondi namusisana kwonka?’ Omusaija akabagarukamu ati: ‘Ninyowe ayazairwe ndi mufu w’amaiso!’ Abantu bakongera bamukaguza: ‘Habwaki hati tokyali mufu w’amaiso?’ Obu yabagambiire ekyamubaireho, bakamutwara omu Bafalisaayo.

Omusaija onu akagambira Abafalisaayo ati: ‘Yesu atairege omu maiso gange itaka kandi yangambira ngu ngende ha kiijongo ndinabemu. Eki nikyo nkozere kandi natandika kuhweza.’ Abafalisaayo bakamugambira bati: ‘Yesu obwaraaba nakiza ha Sabiiti, buli amaani ge tigarukuruga hali Ruhanga.’ Baitu abandi bakagamba ngu: ‘Amaani ge obugaraaba gatarukuruga hali Ruhanga, tiyakusoboire kukiza abantu.’

Abafalisaayo bakeeta abazaire b’omusaija ou Yesu yaigwire amaiso hanyuma babakaguza bati: ‘Nikisoboka kita ngu hati mutabani wanyu nahweza?’ Abazaire  b’omusaija onu bakaba nibatiina habwokuba Abafalisaayo bakaba babagambiire ngu omuntu wena arukwikiririza omuli Yesu naija kubingwa kuruga omu iso’rokaniro. Nahabweki bakagamba ngu: ‘Titumanyire. Inywe mumukaguze.’ Abafalisaayo bakagumizaamu nibamukaguza ebikaguzo bingi kuhikya obuyabagambiire ati: ‘Mbagambiire byona ebibaireho. Habwaki nimunkaguliiriza?’ Abafalisaayo bakabiihirwa muno kandi bamunaga aheeru.

Yesu akaija naserra omusaija onu kandi yamukaguza: ‘Noikiririza omuli Masiya?’ Omusaija akamugarukamu ati: ‘Kuba mbaire mumanyire, nakumwikiririzemu.’ Yesu akamugarukamu ati: ‘Ninyowe Masiya.’ Mali Yesu akaba aine embabazi habwokuba atakize omusaija kwonka, baitu akamukonyera n’okutunga okwikiriza.