Nasisina gud an mga Pariseo kan Jesus ngan namimiling hin rason basi maaresto hiya. Nagsiring hira nga diri hiya sadang manambal durante han Sabbath. Usa ka adlaw han Sabbath, nakakita hi Jesus hin buta nga lalaki nga nakikilimos ha kalsada. Ginsidngan niya an iya mga disipulo: ‘Kitaa niyo kon paonan-o bubuligan han espiritu han Dios ini nga lalaki.’ Linurâ hi Jesus ha tuna ngan naghimo hin lapok pinaagi hito, katapos iginbutang niya ito ha mata han lalaki. Ginsidngan hiya ni Jesus: ‘Kadto paghiram-os ha karigoan ha Siloam.’ Ginbuhat ito han lalaki, salit ha siyahan nga higayon, nakakita hiya.

Diri makatoo an mga tawo. Hira nagsiring: ‘Ini ba an lalaki nga nagliliningkod ngan nakikilimos hadto, o kanawong la niya?’ An lalaki siniring: ‘Ako an lalaki nga natawo nga buta!’ An mga tawo nagpakiana: ‘Kay ano man nga nakakakita ka na?’ Han iginsumat niya an nahitabo, gindara nira hiya ha mga Pariseo.

An lalaki nagsiring ha mga Pariseo: ‘Ginbutangan ni Jesus hin lapok an akon mga mata ngan ginsidngan ako nga maghiram-os. Ginbuhat ko ito, ngan yana nakakakita na ako.’ An mga Pariseo nagsiring: ‘Kon nagtatambal hi Jesus durante han Sabbath, an iya gahum diri tikang ha Dios.’ Pero an iba nagsiring: ‘Kon an iya gahum diri tikang ha Dios, diri unta hiya makakatambal.’

Iginpatawag han mga Pariseo an mga kag-anak han lalaki ngan  ginpakianhan: ‘Kay ano nga nakakakita na an iyo anak?’ Nahadlok an iya mga kag-anak kay nagsiring an mga Pariseo nga bisan hin-o nga tumoo kan Jesus papaiwason ha sinagoga. Salit hira nagsiring: ‘Diri kami maaram. Hiya an pakianhi.’ Ginpinakianhan pa han mga Pariseo an lalaki tubtob nga nagsiring hiya: ‘Iginsumat ko na ha iyo an ngatanan. Kay ano nga ginpipinakianhan la gihap niyo ako?’ Nasina an mga Pariseo salit ginpaiwas nira hiya.

Ginbiling ni Jesus an lalaki, ngan ginpakianhan: ‘May pagtoo ka ba ha Mesias?’ An lalaki nagsiring: ‘Matoo ako kon maaram ako kon hin-o hiya.’ Hi Jesus nagsiring: ‘Ako an Mesias.’ Buotan gud hi Jesus, diri ba? Labot la nga gintambal niya an lalaki, ginbuligan pa niya an lalaki nga magkaada pagtoo.