Yesu ngɛ huɛmɛ etɛ ngɛ Betania. E suɔ a sane wawɛɛ. Mɛ ji Lazaro kɛ e nyɛmimɛ yihi nɛ ji Maria, kɛ Maata. Ligbi ko nɛ Yesu ngɛ Yɔdan Pa a se he ko ɔ, Maria, kɛ Maata tsɔ nɔ ko Yesu ngɔ kɛ sɛ gbi ko nɛ he hia wawɛɛ. E ya de Yesu ke: ‘Lazaro be he wami kulaa. Wa kpa mo pɛɛ nɛ o ba nɔuu!’ Se Yesu yɛ lejɛ ɔ amlɔ nɔuu. E mlɛ, nɛ ligbi enyɔ se ɔ, e de e kaseli ɔmɛ ke: ‘Waa ho Betania ya. Lazaro hwɔ mahe, nɛ i yaa nɛ ma ya tsɛ̃ɛ lɛ.’ E kaseli ɔmɛ de lɛ ke: ‘Ke Lazaro hwɔ mahe ɔ, lɛɛ lɔ ɔ ma ha nɛ e ma ná he wami.’ Yesu de mɛ ke: ‘Lazaro gbo.’

Benɛ Yesu ke e suɔ Betania a, jamɛ a ligbi ɔ ji ligbi eywiɛ nɛ a pu Lazaro. Nihi fuu ya slaa Maata kɛ Maria konɛ a wo a bua. Benɛ Maata nu kaa Yesu ma a, e tu fo kɛ ya ná lɛ ngɛ blɔ ɔ nɔ. E de Yesu ke: “Nyɔmtsɛ, kaa o ngɛ hiɛ ɔ, jinɛ ye nyɛminyumu ɔ ko gbo we.” Yesu de lɛ ke: ‘O nyɛminyumu ɔ maa kpale kɛ ba wami mi ekohu. Maata, anɛ o he enɛ ɔ ye lo?’ Maata ha Yesu heto ke: ‘I he ye kaa ke a ngɛ gbogboehi a si tlee ɔ, lɛ hu a ma tle lɛ si.’ Yesu de lɛ ke: “Imi ji gbogboehi a si temi ɔ kɛ wami ɔ nɛ.”

Kɛkɛ nɛ Maata ya de Maria ke: ‘Yesu ba su hiɛ ɔ.’ Maria tu fo kɛ ya ná Yesu, nɛ ni ɔmɛ hu nyɛɛ e se. Maria kpla si ngɛ Yesu nane nya, nɛ e fo ya hluu. E de Yesu ke: ‘Nyɔmtsɛ, kaa o ngɛ hiɛ ɔ, jinɛ wa nyɛminyumu ɔ ngɛ wami mi!’ Benɛ Yesu na bɔ nɛ Maria ngɛ aywilɛho yee ha a, lɛ hu e bɔni ya fomi. Benɛ ni ɔmɛ na kaa Yesu ngɛ ya foe ɔ, a de ke: ‘Hyɛ bɔ nɛ Yesu suɔ Lazaro ha.’ Se a ti ni komɛ bi ke: ‘Mɛni he je nɛ e he we e huɛ ɔ yi wami ɔ?’ Mɛni Yesu maa pee?

Yesu ya yɔkɔ ɔ he. A ngɔ tɛ agbo ko kɛ tsi yɔkɔ ɔ nya. Yesu de ke: ‘Nyɛ je tɛ ɔ ngɛ yɔkɔ ɔ nya.’ Maata de Yesu ke: ‘Ligbi eywiɛ sɔuu ji nɛ ɔ nɛ a pu lɛ! Be nɛ ɔ mi ɔ, e maa hi fu jee.’ Se kɛ̃ ɔ, a je tɛ ɔ, nɛ Yesu sɔle nɛ e de ke: ‘Tsaatsɛ, i naa mo si kaa o bu mi tue. I le kaa o buɔ mi tue daa, se i ngɛ jã dee ngɛ nimli nɛ a daa  si ngɛ hiɛ ɔ a he je, konɛ a na kaa mo lɛ o tsɔ mi.’ Kɛkɛ nɛ e kpa ngmlaa wawɛɛ ke: “Lazaro, jee kpo!” Nyakpɛ nɔ́ ko ya nɔ: Lazaro je kpo ngɛ yɔkɔ ɔ mi, nɛ bo nɛ a kɛ blaa lɛ ɔ ngɛ e he. Yesu de mɛ ke: ‘Nyɛɛ pɛne lɛ nɛ e ho.’

Nihi nɛ a na nɔ́ nɛ ya nɔ ɔ a ti nihi fuu ná hemi kɛ yemi ngɛ Yesu mi. Se a ti ni komɛ ya de Farisi bi ɔmɛ nɔ́ nɛ ya nɔ ɔ. Kɛ je jamɛ a ligbi ɔ kɛ yaa a, Farisi bi ɔmɛ pee a juɛmi kaa a maa gbe Yesu kɛ Lazaro tsuo. Yesu kaseli 12 ɔmɛ a ti nɔ kake nɛ a tsɛɛ lɛ ke Yudas Iskariot ɔ ya bi Farisi bi ɔmɛ ngɛ laami mi ke: ‘Ke i tsɔɔ nyɛ he nɛ Yesu ngɛ ɔ, sika enyɛmɛ nyɛ ma ha mi?’ A kplɛɛ nɔ kaa a ma ha lɛ sika hiɔ yi 30. Kɛ je jamɛ a be ɔ kɛ ya a, Yudas bɔni he blɔ hlami konɛ e ngɔ Yesu kɛ wo Farisi bi ɔmɛ a dɛ.