Betania markanjja Lazarompi María, Marta kullakanakapampiw jakapjjäna, jupanakajj Jesusan suma amigonakapäpjjänwa. Jesusajj Jordán jawirat khurkatantaskäna ukhajja, Mariampi Martampejj akham sasaw Jesusar jawsayapjjäna: ‘Lazarojj wali usutawa. Mirä amp suma, jankʼak jutam’ sasa. Ukampis Jesusajj janiw ukaratpach jutkänti. Pä urutwa discipulonakapar akham säna: ‘Betaniar sarañäni. Lazarojj ikiskiwa, sartayiriw saraskta’ sasa. Apostolonakapajj akham sapjjänwa: ‘Lazarojj ikiskchejja waliptaskaniwa’ sasa. Ukatwa Jesusajj qhan säna: “Lazarojj jiwatawa” sasa.

Jesusajj Betania markar purïna ukhajja, Lazarojj pusi urunakaw sepulturankjjäna. Waljaniw Martampir Mariampir chuymachtʼirejj sarapjjäna. Martajj Jesusan purinitap yatisajja, tʼijukamaw jupamp jikisir saräna. Akham sarakïnwa: “Tata, jumatï akankasamänjja, janiw jilajajj jiwkaspänti” sasa. Jesusajj sarakïnwa: ‘Jilamajj sartjjaniwa. ¿Ukar creytati?’ sasa. Martajj sarakïnwa: “Jiwatanakajj jaktanipkani ukhaw jupajj sartanjjani” sasa. Ukatwa Jesusajj akham säna: “Jiwatat jaktañasa jakañasa nayätwa” sasa.

Ukatjja Martajj Mariaruw jawsanïna, ‘Jesusajj akankjjewa’ sasa. Mariajj tʼijukamaw Jesusan ukar saräna, jaqenakajj arkapjjarakïnwa. Jesusan ukar purisajja, nayraqatapar killptʼasisaw Mariajj wal jachäna. Akham sarakïnwa: “Tata, jumatï akankasamänjja, janiw jilajajj jiwkasapänti” sasa. Jesusasti Mariar wal jachir uñjasajj jachaqtʼasïnwa. Ukankir jaqenakajja, Jesusar jachir uñjasajj akham sapjjänwa: ‘Cheqas Jesusajj wal Lazaror munasïna’ sasa. Yaqhepasti akham sapjjarakïnwa: ‘¿Kunatsa amigoparojj jiwañat jan salvkpacha?’ sasa. Ukhaman uñjasisajja, ¿kunsa Jesusajj lurpachäna?

Jesusajj Lazaron sepulturaparuw saräna, ukajj mä jachʼa pʼiyänwa, mä jachʼa qalampi punkut atkatatarakïnwa. Ukat akham sänwa: “Uka qal ateqapjjam” sasa. Martasti sarakïnwa: “Tata, niya thujstatäjjpachawa, pusi uröjjchejjaya” sasa. Ukhampachaw uka qal ateqapjjäna, ukatsti Jesusajj akham sasaw orasïna: ‘Awkiy, nayar istʼatamat  yuspärsmawa. Cheqansa nayajj yattwa, jumajj istʼapunistawa. Nayamp chik saytʼatäsipki uka jaqenakajj nayar khitanitam creyipjjañapatakiw jachʼat orasinsma’ sasa. Ukatsti akham sasaw Jesusajj artʼäna: “¡Lázaro, mistunim!” sasa. Ukatsti jiwatäkäna uka Lazarojj telanakampi chʼoqantatpachaw sepulturat mistunïna. Jesusajj akham sarakïnwa: ‘Jararapjjam, sarnaqpan’ sasa.

Uk uñjirinakatjja waljaniw Jesusar creyipjjäna, ukampis yaqhepajj fariseonakar awisiriw sarapjjäna. Ukürutwa fariseonakajj Lazarompir Jesusampir kunjamat jiwayañsa thaqapjjäna. 12 apostolonakat maynejj Judas Iscariote satänwa, jupajj jamasat sarasaw fariseonakar akham jisktʼäna: ‘Jesusar katuntañ yanapapjjerisma ukhajj ¿qhawqsa pagapjjetasma?’ sasa. ‘Jupanakajj 30 qollqe metalanak churapjjäma’ sapjjänwa. Ukatwa Judasajj Jesusar kunjamat katuntayañsa thaqäna.