Zezi le janvuɛ nsan Betanin lɔ. Be janvuɛ’n tra kpa. Be yɛle Lazaa nin i niaan bla Mari nin Mati. Cɛn kun mɔ Zezi o Zurdɛn’n i bue kun lɔ’n, Mari nin Mati be sunmannin sran naan be ko se i kɛ: ‘Lazaa i wunnɛn yo i ya kekle kpa. Yaci, bla ndɛndɛ!’ Sanngɛ Zezi w’a kaman lɛ w’a ɔman. Kɛ cɛn nɲɔn sinnin’n, ɔ seli i sɔnnzɔnfuɛ mun be kɛ: ‘Maan e wɔ Betanin. Lazaa su lafi, n su ko tinnge i.’ I akoto mun be seli i kɛ: ‘Sɛ Lazaa su lafi’n, ɔ́ wá yó juejue.’ Yɛ Zezi kɛnnin i weiin kɛ: ‘Lazaa w’a wu.’

Kɛ Zezi jú Betanin lɔ’n, nn be sieli Lazaa w’a di cɛn ba nnan. Sran kpanngban kpa be bali Mati nin Mari be fɔnvɔlɛ. Kɛ Mati tili i kɛ Zezi su ba’n, ɔ ɔli i atin kpalɛ ndɛndɛ. Ɔ seli Zezi kɛ: “Min Min, sɛ ɔ ti kɛ a o wa’n, nn min niaan bian w’a wuman.” Zezi seli i kɛ: ‘Ɔ niaan bian wá sɛ́ i sin nguan nun ekun. ?Mati, a lafi su?’ Mati tɛli i su kɛ: ‘N lafi su kɛ, kɛ sran mun bé wá cɛ́n’n, ɔ́ cɛ́n wie.’ Zezi seli i kɛ: “Min yɛ n cɛn sran-ɔn. Yɛ min yɛ n man sran nguan-ɔn.”

Mati ko seli Mari kɛ: ‘Zezi w’a ba.’ Mari wanndi ɔli Zezi i wun lɔ. Kɛ ɔ́ kɔ́’n, sran mun be suli i su. Ɔ ko kotoli Zezi bo. Kɛ ɔ́ yó sɔ’n, nn ɔ́ sún. Ɔ seli i kɛ: ‘Min Min, sɛ ɔ ti kɛ a o wa’n, nn e niaan bian te o nguan nun.’ Zezi wunnin kɛ Mari i wla w’a bo i wun dan, i sɔ’n ti’n, i bɔbɔ sunnin wie. Kɛ sran mun be wunnin kɛ ɔ su sun’n, be seli kɛ: ‘Nanwlɛ, ɔ klo Lazaa sakpa.’ Sanngɛ be nun wie mun be seli kɛ: ‘?Ngue ti yɛ w’a demɛn i janvuɛ’n niɔn?’ ?A si like nga Zezi yoli’n?

Zezi ɔli asieliɛ’n su lɔ. Yɔbuɛ dan kun kata asieliɛ’n i nuan’n su. Ɔ seli sran mun kɛ: ‘Amun yi yɔbuɛ’n.’ Mati seli kɛ: ‘W’a di cɛn nnan. I fuɛn’n su bɔn.’ Ɔ nin i sɔ ngba’n, be yili yɔbuɛ’n. Kpɛkun Zezi srɛli Ɲanmiɛn. Ɔ seli kɛ: ‘Min Si, ń yó wɔ kwla, afin a ti min nuan ndɛ’n. N si kɛ a ti min nuan ndɛ’n titi. Sanngɛ n man min nɛn’n su n kan ndɛ’n, naan sran mun be wun i wlɛ kɛ wɔ yɛ a sunmannin min-ɔn.’ Kpɛkun ɔ kpannin kekle kpa seli kɛ: “Lazaa, fite!” Kɛ ɔ yoli sɔ’n, Lazaa fin asieliɛ’n nun fiteli. Tannin tanmue mun be cici i wun. Zezi seli kɛ: “Amun ɲannji i maan ɔ wɔ.” Nanwlɛ, sa sɔ’n ti abonuan dan.

Be nga be wunnin sa sɔ’n nun’n, be nun sunman be lafili Zezi su. Sanngɛ be nun wie mun be ko kan kleli Farizifuɛ mun. Kɛ ɔ fɛ i lɛ’n, Farizifuɛ mun be kunndɛli kɛ bé kún Lazaa nin Zezi. Akoto blu-nin-nɲɔn (12) mun be nun kun mɔ be flɛ i kɛ Zida Iskariɔti’n, ɔ ko wunnin Farizifuɛ mun be wun. Ɔ usali be kɛ: ‘?Sɛ n uka amun naan amun trɛ i’n, amún mán min nɲɛ?’ Be seli i kɛ bé mɛ́n i jɛtɛ ufue ablasan (30). Kɛ ɔ yoli sɔ’n, Zida kunndɛli blɛ kpa kun naan ɔ́ yí Zezi mán Farizifuɛ mun.