Yesu alikwete abanankwe batatu abaleikala mu Betani. Aba abanankwe bali ni Lasaro na bankashi yakwe babili, Maria na Marita. Bushiku bumo ilyo Yesu ali ku lubali lumbi ulwa Yordani, Maria na Marita balitumine uwa kuyamweba ati: ‘Lasaro mulwele sana. Iseni bwangu!’ Nomba Yesu taile apo pene. Aliloleleleko mpaka papita inshiku shibili e lyo aeba abasambi bakwe ati: ‘Tiyeni ku Betani. Lasaro nalaala utulo, nalaya mubuusha.’ Abatumwa batile: ‘Nga Lasaro nalaala utulo, alaumfwako bwino.’ E ico Yesu abebele ati: ‘Lasaro nafwa.’

Ilyo Yesu afikile mu Betani, ninshi apo bashikiile Lasaro palipita ne nshiku shine. Abantu abengi balishile ku kusansamusha Marita na Maria. Ilyo Marita aumfwile ati Yesu naisa, abutukiile uko ali pa kuti amukumanye. Marita aebele Yesu ati: “Mwe Shikulu, nga mwali kuno ndume yandi nga tafwile.” Yesu amwaswike ati: ‘Ndume yobe alabuuka. Bushe wasumina ifi nakweba Marita?’ Marita ayaswike ati: ‘Nalisumina ukuti akema ilyo kukaba ukubuuka.’ Yesu amwebele ati: “Nine kubuuka kabili umweo.”

Lyena Marita aile kuli Maria no kumweba ati: ‘Yesu naisa.’ Maria alibutukiile Yesu kabili ibumba lya bantu lyalikonkele. Maria awile pa makasa ya kwa Yesu kabili alelila fye ukwabula ukuleka. Aebele Yesu ati: ‘Mwe Shikulu, nga mwali kuno, ndume yesu nga tafwile!’ Ilyo Yesu amwene ifyo ali no bulanda, na o atendeke ukulila. Ilyo abantu bamwene alelila, batile: ‘Moneni ifyo Yesu atemenwe Lasaro.’ Lelo bamo baleipusha abati: ‘Cinshi alekeele umunankwe afwa?’ Finshi Yesu acitile?

Yesu aile uko bashikile Lasaro, pa nshiishi yakwe balibikilepo icilibwe icikuulu. Abebele ati: ‘Fumyenipo ilibwe.’ Marita aebele Yesu ati: ‘Nomba napapita inshiku shine! Alanunka nga mwafumyapo icilibwe.’ Na lyo line, balifumishepo icilibwe kabili Yesu alipepele ati: ‘Tata, ndemutootela ukuti mwang’umfwa. Nalishiba ukuti lyonse mulang’umfwa; lelo nalanda ifi pa mulandu  wa bantu bali pano, pa kuti basumine ukuti ni mwe mwantumine.’ Lyena abilikishe ati: “We Lasaro, fuma!” Awe e fyo Lasaro afumiine ku nse ya nshiishi, ninshi napombwa ne fisalu. Yesu atile: “Mukakuleni, mulekeni aleya.”

Abantu abengi abamwene ifyo Yesu acitile, balimutetekele. Lelo bamo baile mukweba abaFarise ifyo acitile. Ukutula lilya line, abaFarise balefwaya ukwipaya Lasaro na Yesu wine. Umo pa batumwa ba kwa Yesu uo baleita ati Yuda Iskariote, aile ku baFarise no kubepusha ati: ‘Ni shinga mukampeela nga namwafwa ukusanga Yesu?’ Bamwebele ati bakamupeela indalama sha silfere 30, kabili Yuda atampile ukufwaya inshita iisuma iya kuti abaFarise bakekatilepo Yesu.