Yesus nya bati rikyor ḇeḇarek ro Betani. Snonsnon skoḇena iso Lazarus ma srar ḇyesuya Maria ma Marta. Fafisu Yesus isya ro Perea, Maria ma Marta suyankinem ḇe i, ’Rwama fasaw snaro Lazarus iduf marḇak!’ Ḇape Yesus ryama ḇeri ḇa, mboi ḇyarek ro diwa ras risuru wer. Inja ryo diwa kaker ḇo Lazarus imar. Ma kirine Yesus ikofen ḇe manfamyan ḇyesya, ’Mkorama kora ḇe Betani. Lazarus denef, inja nari yaḇani ro anenef ḇyeja.’ Manfamyan ḇyesya sikofen, ’Denef ido, na iprei fasaw ro dafduf ḇyeja.’ Ḇape manfamyan ḇyesine sifawi mnis rosai Yesus ikofen ine ḇa, mura Yesus ikofen bos yoḇ si, ’Lazarus imar kwar.’

Fafisu skora ro Betani, sikram Lazarus ras rifyak kwar. Snonkaku sya sibor srama fa sḇuk wos ḇeyun sneprei ḇe Maria ma Marta su. Fafisu Marta ryower Yesus ryama, rya fa isrow kuker Yesus i. Ikofen, ”Tuan e, rwo dine kada, srar yedi na imar ḇa.” Yesus ikofen, ’Srar bedi na ikenem wer. Marta wakyar ke? Kyarem, ’Imbo Tuan yakyar na ikenem wer ro kaḇakḇok ḇero fafisu iwama.’ Yesus ikofen, ”Aya iso kaḇakḇok ma kankenem ya.”

Ramnai Marta isrow kuker Maria i ma ikofen, ’Yesus isya ro dine kwar.’ Maria rya fa isrow kuker Yesus i, ma snonkaku ḇebor sya sisoi. Maria kyunem ro Yesus wemin ḇyeja ma kyanes. Doḇe, ’Tuan e, Ausya ro dine kada, na srar yedi ikenem kaker!’ Yesus myam Maria ḇyesneso kaku, inja dakkanes kako. Fafisu snonkaku ḇemam Yesus kyanes anya sikofen, ’Ara iswar kaku Lazarus i.’ Ḇape sia skara, ’Rosai ḇefnai fa ifnoḇek bati ḇyedine ḇa ya?’ Rosai na Yesus ifrur ya?

Yesus ryaḇe kubir ro aḇyaḇ oso, moḇ sikram Lazarus i. Sidwarek kubir ani kuker karui ḇeba oso. Ḇape Yesus iwan fa sikris karui ani. Mboi Marta ikofen, ’Imar ras rifyak kwar! Na baken ḇyedi isnarem kwar.’ Ḇape sikris karui ani monda, ma  Yesus inadi, ’Mami, yakofen kasumasa snaro rwower aya. Yafawi rwower rosai yakofen na kwar. Yawos naba ḇe Au insama snonkaku sine sifawi auso ḇewan ayanya. Ramnai dor naba, ”Lazarus, wasasyare!” Rosai ḇeḇejadi ya: Lazarus isasyar ro kubir anya ḇeri. Yesus ikofen, ”Mkoper kruḇen ḇefesepen ina insama imbrane.”

Snonkaku ḇemam Lazarus kaḇakḇok ḇyedine sikyar kaku ḇe Yesus i. Ḇape ono sisya sikofenḇair ḇe snonkaku Farisi sya. Rodia snonkaku Farisi sya imbe smun Lazarus ma Yesus su. Yudas Iskariot, oser ro Yesus manfamyan ri 12 ḇyesi, isrow fasis kuker snonkaku Farisi sya ma ifuken, ’Yafnoḇek mko fa mkosrow kuker Yesus ido, nari mkoḇuk pipi rifis ḇe aya?’ Soḇe nari sḇuk pipi sarak ri 30 ḇe i. Mura syewar swaf ḇepyum insama dun snonkaku Farisi sine fa sfor Yesus i.