Lazare a bekale bé, Marie ba Marthe, be mbe beta bemvôé be Yésus. Be mbe be nyiñe’e Béthanie. Môs éziñ, Yésus a too Jourdain yat, Marthe ba Marie be nga lôme nye mbañete wu: ‘Lazare a kon abui. Éngôngol, za’a avôl!’ Ve Yésus a nji ke été été. Mvuse mimôs mibaé, a nga jô beyé’é bé na: ‘Enkelané Béthanie. Lazare a ke ôyo, ma ke vele nye.’ Ve minlôman mi nga jô nye na: ‘Nge a ne ôyo, nalé a ye volô nye na a bo mvo’é.’ Ane Yésus a nga kôme kate be na: ‘Lazare a wuya.’

Yésus a nga kui Béthanie valé Lazare a boya melu menyine soñ. Nsamba bôt ô nga zu volô Marie ba Marthe minlem. Éyoñ Marthe a nga wô’ô na Yésus a ne zen, a nga ji’a ke tôbane nye. A nga jô nye na: “A Tat, nge ô nga to va, ve ndôme jam é nji wu.” Ane Yésus a nga jô nye na: ‘Nyo ndôm a ye beta nyiñ. A Marthe, ye wo buni de?’ Nye’e na: ‘Ma buni na a ye wômô môs ñwôman miñwuan.’ Nde Yésus a nga jô nye na: “Ma me ne ñwômôlô bôt, me ne fe ényiñ.”

Ane Marthe a nga ji’a ke kate Marie na: ‘Yésus a ne va.’ Marie ve bumu mbil, nsamba bôt ô tôñe’e nye. Ane a nga ku Yésus mebo a yônô’ô abui. A nga jô na: ‘A Tat, nge ô mbe va, ve ndôme jam é ngenan é vee!’ Éyoñ Yésus a nga yene mintaé mi mbe Marie nlem, nye’e fe a nga taté na a yôn. Éyoñ bôte be nga yene mili’i mé, be nga jô na: ‘A mbe fo’o a nye’e Lazare nya nya abui.’ Ve bôte bevo’o be mbe be jô’ô na: ‘Amu jé a nji nyii mvôé jé?’ Ye wo yem jôm Yésus a nga bo?

Yésus a nga ke soñ; beta akok a mbe a buti’i mbé ya soñ. Ane a nga jô na: ‘Va’ané ako’o ete.’ Marthe ke na: ‘A boya melu menyin. A nga boé.’ Ane be nga vaa akok, Yésus a taté na a ye’elan: ‘Ésaa wom, akiba amu wo vô’ôlô ma. Ma yeme na wo vô’ôlô ma éyoñ ése, ve ma kobô yôb été asu na bôte ba be  yeme na, wo ô nga lôme ma.’ Ane a nga loone Lazare a jô’ô na: “A Lazare, kui’ atan!” Étua jam ve boban: Lazare ve vame soñ, nyôle jé é too nka’an a bindélé. Yésus na: “Vaané nye biôme nyô, a ke.”

Abui bôt e mbe valé e nga buni Yésus. Ve ba bevo’o be nga ke de kate Bepharisien. Ane Bepharisien be nga taté na ba jeñe na, be wôé Lazare ba Yésus. Ja’a Judas, nlômane Yésus, ô nga ke yene Bepharisien asoé a sili be na: ‘Me kuane mia nye tañ aya?’ Ane be nga kui tyiñ na ba ye ya’ane nye bifas bi argent 30; Judas ve taté na a fas aval a ne volô Bepharisien na be bi Yésus.