Yezu tun be ni teri sɔbɛ saba ye Betani: Lazari n’a balimamuso fila, Mariyamu ni Marita. Loon dɔ, ka Yezu to Zurudɛn baji faan dɔ fɛ, Mariyamu ni Marita ye mɔgɔ bila ka taga a fɔ a ye joona joona ko: ‘Lazari man kɛnɛ ani a ka bana ka jugu. Sabari ka na joona joona!’ Nka Yezu ma sin ka taga. A ye tile fila kɛ ka sɔrɔ k’a fɔ a ka kalandenw ye ko: ‘An ka taga Betani. Lazari be sinɔgɔra, n’ bena taga a kunu.’ Cidenw ko: ‘Ni Lazari be sinɔgɔra, o bena a dɛmɛ ka kɛnɛya.’ Yezu y’a fɔ u ye ka gwɛ ko: ‘Lazari sara.’

Yezu sera Betani k’a sɔrɔ Lazari suu donna kaburu kɔnɔ kabi tile naani. Mɔgɔ caaman tun nana Marita ni Mariyamu dusu saalo. Marita y’a mɛn ko Yezu be nana dɔrɔn, a teliyara ka taga a kunbɛn. A y’a fɔ Yezu ye ko: “Matigi, ni e tun be yan, ne balimacɛ tun tena sa.” Yezu y’a fɔ a ye ko: ‘I balimacɛ bena kunu. Marita, i lanin b’o la wa?’ Marita ko: ‘N’ lanin b’a la ko a bena kunu sukununi wagati la.’ Yezu y’a fɔ a ye ko: “Ne le be suuw kunun, ne be nii di.”

O kɔ, Marita tagara a fɔ Mariyamu ye ko: ‘Yezu nana.’ Mariyamu bolila ka taga Yezu fɛ, jama fana tugura a kɔ. A benna Yesu seen kɔrɔ n’a be kasi hali a tɛ ban. A ko: ‘Matigi, n’i tun be yan, an balimacɛ tun bele bena kɛ niin na!’ Yezu y’a ye ko Lazari saya ye Mariyamu tɔɔrɔ kojugu. Ale fana y’a daminɛ ka kasi. Jama y’a ye ko a be kasira minkɛ, u ko: ‘Lazari koo tun ka di Yezu ye dɛ!’ Nka dɔw tun b’u yɛrɛ ɲininga ko: ‘Mun na a ma a tericɛ kisi saya ma?’ Yezu tun bena mun lo kɛ o kɔ?

Yezu tagara Lazari ka kaburu la. Kabakuruba dɔ tun y’a datugu. A ko: ‘ A’ ye kabakuru nin bɔ yen.’ Marita ko: ‘A sara a tile naani lo ye! A kasa bena bɔ.’ Nka u ye kabakuru bɔ yen. Yezu ye Ala deli ko: ‘Ne Faa, n’ b’i fo sabu i be n’ lamɛn. N’ b’a lɔn ko i be n’ lamɛn tuma bɛɛ, nka n’ be kumana fanga la walisa  mɔgɔ minw be yan, u k’a lɔn ko e lo ye n’ ci.’ O kɔ, a y’a fɔ fanga la ko: ‘Lazari, bɔ kɛnɛma!’ Kabako dɔ kɛra: Lazari bɔra kaburu kɔnɔ, fani tun melekenin lo a la. Yezu ko: ‘ A’ y’a foni k’a to yen.’

O koo kɛra minw ɲɛɛ na, u caaman lara Yezu la. Nka u dɔw tagara a lakali Fariziɲɛw ye. Kabi o tuma, Fariziɲɛw y’a ɲini ka Yezu ni Lazari faga. Yezu tun be ni ciden 12 lo ye. Kelen tɔgɔ ko Zuda Isikariyɔti. Ale dogora ka taga a fɔ Fariziɲɛw ye ko: ‘Ni n’ ye Yezu yɔrɔ yira aw la, aw bena n’ sara joli?’ U bɛnna ko u bena warigwɛ 30 di a ma. Zuda y’a daminɛ ka sababu ɲini walisa ka Yezu don Fariziɲɛw bolo.