Eratou tiko e Pecani e tolu na itokani dredre i Jisu. Qori o Lasarusa kei rau na ganena o Meri kei Marica. Dua na siga, ni tiko o Jisu ena tai ni Joritani, erau vakauitukutuku vua o Meri kei Marica: ‘E tauvimate bibi o Lasarusa. Yalovinaka, totolo mai!’ E sega ni biubiu sara o Jisu, ia e wawa tale me rua na siga sa qai kaya vei ratou nona tisaipeli: ‘Tou lako i Pecani. Sa moce o Lasarusa, au na lako qo meu vakayadrati koya.’ Eratou kaya na yapositolo: ‘E vinaka me moce o Lasarusa, ena bula vinaka kina.’ E mani tukuna vakamatata vei ratou o Jisu: ‘Sa mate o Lasarusa.’

E qai yaco i Pecani o Jisu ni sa siga va ena ibulubulu o Lasarusa. Levu era lako yani mera vakacegui Marica kei Meri. Ni rogoca o Marica ni sa tiko o Jisu, e lako totolo sara me raici koya. E kaya: “Turaga, ke oni a tiko eke, ke a sega ni mate o ganequ.” E kaya vua o Jisu: ‘Ena tucake tale na ganemu. O vakabauta qori Marica?’ E kaya: ‘Au kila ni na tucake tale ena gauna ni veivakaturi.’ E kaya vua o Jisu: “O yau na vu ni veivakaturi kei na bula.”

E lai tukuna o Marica vei Meri: ‘Sa tiko qo o Jisu.’ E cici sara o Meri ra qai muri koya na ilala levu. E cuva e yava i Jisu qai tagi tiko ga. E kaya: ‘Turaga, ke oni a tiko eke ke a sega ni mate o ganei keirau!’ E tagi tale ga o Jisu ni raica na levu ni rarawa i Meri. Nira raica qori na ilala levu, era kaya: ‘E lomani Lasarusa sara ga.’ Ia eso era vaqaqa: ‘Cava e sega ni tarova kina na mate i nona itokani?’ Na cava ena cakava o Jisu?

E lako o Jisu ina ibulubulu e sogo tu ena dua na vatu levu. E vakarota: ‘Ni vaqiqica tani na vatu.’ E kaya o Marica: ‘Sa ikava ni siga qo! Sa na boi na yagona.’ Era vaqiqica na vatu qai masu o Jisu: ‘Tamaqu, vinaka nomuni dau rogoci au. Au kila ni oni dau rogoci au, ia au vosa i cake mera vakabauta kina na tu qo  ni oni talai au mai.’ Oti qori, e kaya sara vakadomoilevu: “Lasarusa, lako mai!” E veivakurabuitaki na ka e yaco. E lako mai tuba o Lasarusa ni viviraki tu ena isulu lineni. E kaya o Jisu: “Sereki koya me lako.”

Levu era mai vakabauti Jisu nira raica qo. Ia eso era lai tukutuku vei ira na Farisi. Era vinakata sara na Farisi mera vakamatei Lasarusa kei Jisu. E lako lo vei ira o Jutasa Isikarioti, e dua vei ratou na 12 na yapositolo me taroga: ‘E vica oni na solia vei au keu vakaraitaki Jisu vei kemuni?’ Era duavata mera solia vua e 30 na tikinisiliva, mani vaqara o Jutasa e dua na gauna vinaka me soli Jisu kina.