Iai raoraon Iesu ae rangi n tatangiriia aika teniman, ake a memena i Betania. Bon Rataro ma mwaanena aika uoman aika Maria ao Mareta. N te bong teuana, ngke e mena Iesu n iteran te Ioretan are teuana, ao a a kanakoa aia rongorongo Maria ao Mareta ni kawaekoaa, ni kangai: ‘E a rangi n aoraki Rataro. Taiaoka ma kawaekoako n nakomai!’ Ma e aki nako ngkekei naba Iesu. E tiku riki uabong ao imwina e taku nakoia taan rimwina: ‘Ti a nako Betania bwa e matu Rataro ao N na nako ni kautia.’ A taku abotoro: ‘Ngkana ngaia bwa e matu Rataro, e na reke marurungina iai.’ Ma e a kamataataa raoi Iesu nakoia ni kangai: ‘E a mate Rataro.’

Ngke e roko Iesu i Betania, ao ai abong ana bong Rataro n te ruanimate. A roko aomata aika bati bwa a na kabebetea Mareta ma Maria. Ngke e ongo Mareta bwa e a roko Iesu, e kawaekoaa n nako ni butimwaeia ao e taku: “Te Uea, ngke arona bwa ko mena ikai, ao e na bon aki mate mwaaneu.” E taku Iesu nakoina: ‘E na manga maiu mwaanem. Ko kakoauaa aei Mareta?’ E taku neiei: ‘I kakoauaa bwa e na manga kautaki n te mangauti.’ E taku Iesu nakoina: “Boni ngai te mangauti ao te maiu.”

Imwin anne, e a nako Mareta ni kawara Maria ao e taku nakoina: ‘E a roko Iesu.’ E kawaekoaa Maria ni kawara Iesu, ao a rimwina aomata aika bati. E bobaraaki neiei i waen Iesu ao e tang. E taku: ‘Te Uea, ngke arona bwa ko mena ikai, e na bon teimatoa ni maiu mwaanera!’ E noria Iesu bwa e rangi n rawawata neiei ngaia are e a manga tang. Ngke a noria aomata aika bati bwa e tang Iesu ao a taku: ‘Noria, e rangi ni korakora tangiran Rataro iroun Iesu.’ Ma a iango ni kangai tabeman: ‘E aera ngke e aki kamaiua raoraona?’ Tera ae e na karaoia Iesu imwina?

E nako Iesu nakon te ruanimate ae bonotaki matana n te atibu ae bubura. E tua ni kangai: ‘Kanakoa te atibu.’ E taku Mareta: ‘Ai ana kaabong ngkai! E a bae ni boiboi rabwatana.’ Ma a boni kanakoa te atibu ao e tataro Iesu ni kangai: ‘Tamau, ko rabwa ngkai ko ongo irou. I ataia bwa ko ongongo irou n taai nako, ma I taetae ni kanenea bwanaau bwa a aonga n ataia aomata aikai bwa ko boni kanakomaiai.’ Imwina, e  takarua n te bwanaa ae korakora ni kangai: “Rataro, otinako!” Ao e riki te bwai ae kamimi: E otinako Rataro man te ruanimate ao e niniraki n te ninira. E taku Iesu: “Kabwaraa ao kanakoa.”

A bati aika a nora aei ao a a onimakina Iesu. Ma tabeman a nako ni kaongoia Baritaio. Man te tai anne, ao Baritaio a a kani kamatea Rataro ao Iesu. Ao temanna mai buakoia abotoro ake 12 ae Iuta Itekariota, e karabaa ni kawariia Baritaio ao e titirakinia ni kangai: ‘Iraua boou ngkana I buokingkami ni kamwanea Iesu?’ A kariaia bwa a na kabooa n 30 te mwakoro n tirewa, ngaia are e a ukoukora Iuta te tai ae angaraoi are e na kamwanea iai Iesu nakoia Baritaio.