Jesus het drü ganz gueti Fründe, wo z Bethanie wohned. Das sind de Lazarus und sini beide Schwöschtere, d Martha und d Maria. Wo Jesus einisch uf de andere Siite vom Jordan isch, chunnt er vo de Martha und vo de Maria e Nachricht über, wo pressiert: «De Lazarus isch sehr chrank. Bitte chumm schnell!» Aber Jesus bliibt no zwei Täg dört und nachher seit er zu sine Jünger: «Chömmed, mir göhnd uf Bethanie. De Lazarus isch iigschlafe und ich möcht ihn jetzt go wecke.» D Jünger säged: «Wenn er am schlafe isch, de wird er sicher glii wider gsund.» Da seit Jesus ganz direkt zu ihne: «De Lazarus isch gstorbe.»

Wo Jesus z Bethanie achunnt, isch de Lazarus scho sit vier Täg im Grab. Es sind vil Lüt cho, zum d Martha und d Maria z tröschte. Wo denn d Martha ghört, dass Jesus cho isch, springt si ihm schnell entgege. Si seit: «Herr, wenn du da gsi wärsch, denn wär min Brüeder nid gstorbe.» Da verspricht ihre Jesus: «Din Brüeder wird wider lebe. Glaubsch du das, Martha?» Si git ihm zur Antwort: «Ja, ich glaube dra, dass er emal wird uferstah.» Da seit Jesus: «Ich bin d Uferstehig und s Lebe.»

Jetzt gaht d Martha zu de Maria und verzellt ihre: «Jesus isch da.» Sofort springt d Maria zu Jesus und d Lüt göhnd ihre hindenache. Si gaht vor ihm uf d Chnüü und hört nüm uf z brüele. Si seit: «Herr, wenn du da gsi wärsch, denn würd üse Brüeder no lebe!» Jesus gseht, wie fescht d Maria truurig isch, und denn chömmed au ihm Träne. Wo d Mensche das gsehnd, säged si: «Er het de Lazarus würklich gern gha.» Aber es paar Lüt fraged sich: «Wiso het er nüt degäge gmacht, dass sin Fründ stirbt?» Was macht echt Jesus als Nöchschts?

Er gaht zum Grab. Das isch e Höhli miteme grosse Stei voredra. Jesus seit zu de Lüt: «Rolled de Stei uf d Siite.» Da seit d Martha: «Aber de Lazarus isch doch scho vier Täg tot! Er stinkt sicher scho.» De Stei wird gliich weggrollt und Jesus fangt a bete: «Vater, danke, dass du uf mini Bitt losisch. Ich weiss, dass du mir immer zuelosisch. Aber ich bete eso, dass d Lüt mich chönnd ghöre und dra glaubed, dass du mich gschickt hesch.» Nachher rüeft er luut: «Lazarus, chumm use!» Da passiert öppis Unglaublichs: De Lazarus chunnt us em Grab use! Er isch no i Liinetüecher iigwicklet und drum seit Jesus: «Nehmed ihm die weg, und lönd ihn la gah.»

Vil, wo das gseh hend, glaubed jetzt a Jesus. Aber es paar Lüt göhnd zu de Pharisäer und verzelled ihne alles. Vo jetzt a wend d Pharisäer Jesus und de Lazarus töte. De Judas Iskariot, eine vo de 12 Aposchtel, gaht heimlich zu de Pharisäer und fragt: «Was zahled ihr mir, wenn ich euch verrate, wo Jesus isch?» Si bieted em Judas 30 Silberstück a, und defür suecht er für d Pharisäer e gueti Glegeheit, wo si denn Jesus chönnd gfange neh.