Eejana apünüinshii naʼaleewainyuu Jesuu kepiakana chaa Betania. Lázaro, María otta Marta nanülia. Pawalaawashii naya. Soʼu wanee kaʼi, chajachi Jesuu waneemüin saʼata tü süchikat Jordán. Shiasaʼa María sümaa Marta naluwataaka wanee pütchi nümüin Jesuu: «Mayeinshi maʼin Lázaro. Anashi püntamaatüle». Nnojoika nuʼunamaatüin Jesuu, naʼatapajüin sülatüin piama kaʼi. «Anakajaʼa waleʼejüle wachikuaʼa Betaniamüin. Chi watünajutkai Lázaro, atunkushi nia. Chainjachikaʼa joo taya sünain achijiraa nia», nümakalaka mapa namüin na nikirajüinkana. Nasoutakalaka nümüin Jesuu na aluwataaushiikana: «Müleka nutunküle Lázaro, analeerü naaʼin». Lotoka joo nünüiki Jesuu namüin: «Ouktüichipa Lázaro».

Nüntapa Jesuu Betaniamüin, eeirü maʼaka pienchi kaʼi süchikijee niʼitaanüin Lázaro. Antüsü wainma wayuu shipialuʼumüin Marta jee María sünain alapajaa naaʼu. Saapaiwaʼaya Marta nüchiki Jesuu sünain nüntüin, süpanapajaka nia. «Senyotkalee, müleka yaajachireje pia, nnojoishije ouktüin chi tawalakai», sümaka nümüin Jesuu. Nümaka Jesuu sümüin: «Osoʼiraweechi aaʼin chi puwalakai. ¿Aashin punoujain anain tü tamakat pümüin?». «Aa, tatüjaa aaʼuchi sümaa nüsoʼiraweechin aaʼin soʼu tü kaʼi süsoʼiraainjatkalü oʼu tü wayuukalüirua», sümakalaka Marta nümüin. «Tayakai, taya atüjaka osoʼireʼeraa saaʼin wayuu süpüla katüinjatüin soʼu waneepia», nümakalaka Jesuu sümüin.

Suʼunaka Marta eemüin María jee sümaka sümüin: «Isaa antüin Jesuu». Suwataaka María eemüin Jesuu jee sükoʼulaka wayuu süchiirua. Süntapa María eemüin Jesuu, süsapainkasü shia nümülatuʼu sümaa shiʼyalajüin maʼin. «Senyotkalee, müinka yaajachireje pia, nnojoishije ouktüin chi tawalakai», sümaka María nümüin Jesuu. Niʼrapa Jesuu María sünain aʼyalajaa maʼin, niʼyalajaka. «Aireekaijaʼa maʼi nia nüpüla», namaka na wayuukana sutuma neʼrüin Jesuu sünain aʼyalajaa. «¿Jamüshi nnojoikaʼa niiyajüin paala chi wayuukai suulia ouktaa?», eeshii joo na makana. ¿Kasakaʼa naaʼinrüin Jesuu?

Nüntaka Jesuu amuuyuupaʼamüin. Eejachire niʼitaanüin müliashii, müsü aka saaʼin wanee paü keʼipolosü wanee ipa miyoʼu. «Jüsünneʼera türa shirousekat», nümaka Jesuu. «Senyotkalee, keejuuichin, pienchitchi kaʼi süchiiruajee niʼitaanüin», sümaka Marta nümüin. Süsünneʼennaka tü shirousekat. Nuʼuraajaka Jesuu sünain müin nünüiki: «Taataa, taapüin pümüin analuʼut maaʼulu yaa süka paapüin tanüiki. Tamüsü tüü süpüla naapüinjatüin na wayuu yaakana yaa süpüla nanoujain sünain püjünalain taya». Nümaka Jesuu sümaa emetuluin  nünüiki: «Lázaro, pujuʼitaa». Nujuʼitaaka chi outushikai sünain katüin noʼu koʼoyoosü süka kuluulu najapü, nuuʼui ooʼulaka nuʼupünaa. «Juwasta nuulia türa koʼoyookat akan nia. Juuʼulaapa nuʼunaiwa nümüiwaʼa», nümaka Jesuu.

Wainma na wayuu anoujakana nünain Jesuu sutuma neʼrüin tü kasa pülasü naaʼinrakat. Otta waneinnua, oʼunüshii nanainmüin na fariseokana sünain aküjaa namüin süchiki tü naaʼinrakat Jesuu. Soʼujeʼereʼeya kaʼikat tia, nachajaain sukuwaʼipa na fariseokana süpüla noʼutuin naaʼin Lázaro nümaa Jesuu. Niasaʼa chi Judas Iscariote münakai, wanee napüshi na aluwataaushiikana, oʼunushi nia ojuunaa sünain maa namüin na fariseokana: «¿Jeʼreerü juwalaajüin tamüin müleka taapüle nikii Jesuu jümüin?». Naküjaka süchiki nawalaajüinjachin nia süka 30 nneerü pülaata. Anaka tia nümüin Judas jee nüchajaaka sukuwaʼipa süpüla naapüin nikii Jesuu namüin.